मनोज जैयस्वाल, वाशिम प्रतिनिधी

Mumbai-Nagpur Expressway decomposed body discovery latest update : मुंबई-नागपूर समृद्धी महामार्गा लगत कुजलेल्या अवस्थेत एका पुरूषाचा मृतदेह आढळला आहे. धक्कादायक म्हणजे, मृतदेह दोन भागात विभागलेला आहे. एकीकडे पाय अन् दुसरीकडे कमरेच्या वरचा भाग दिसतोय. वाशिम जिल्ह्यात मृतदेह आढळल्याने एकच खळबळ उडाली आहे. हा मृतदेह नेमका कुणाचा आहे? घातपात झालेला आहे? अपघात आहे? की कुणी इथं मृतदेह आणून टाकला? याबाबत चर्चा सुरू झाल्या आहेत. पोलिसांनी मृतदेह ताब्यात घेतला असून तपास सुरू केला आहे. पोलिसांनी मृतदेह पोस्टमार्टमसाठी पाठवला आहे.

वाशिम जिल्ह्यातून जाणाऱ्या समृद्धी महामार्गावर मालेगाव ते शेलुबाजार दरम्यान चॅनल २१८ जवळ मुंबई कॉरिडोरवर अनोळखी व्यक्तीचा कुजलेल्या अवस्थेत दोन भागात मृतदेह आढळल्याने खळबळ उडाली. मुंबई कॉरिडोरच्या बॅरिकेटला लागून हा मृतदेह आढळला आहे. दोन भागात हा मृतदेह आढळल्याने हा घातपात आहे की, कुणी हा मृतदेह आणून टाकला हे आता पोलिसांच्या तपासानंतरच स्पष्ट होणार आहे. या व्यक्तीचा मृत्यू आठ ते दहा दिवसांपूर्वी झाला असावा, अशी शक्यता डॉक्टरांनी व्यक्त केली आहे. पोलिसांकडून या प्रकरणाचा कसून तपास केला जात आहे.

समृद्धीवर आढळलेला मृतदेह पूर्णपणे कुजलेला असल्याने ओळख पटवणे पोलिसांना कठीण झाले आहे. पोलिसांनी परिसरातील सीसीटीव्ही फुटेज तपासण्यास सुरुवात केली आहे. समृद्धी महामार्ग हा मुंबई-नागपूर जोडणारा वेगवान मार्ग असल्याने येथे अपघातांच्या घटना वारंवार घडतात. मात्र, मृतदेह दोन भागांत सापडणे हे भयानक आणि गंभीर आहे. या प्रकणात हत्येची शक्यता नाकारता येत नाही.

दरम्यान, या घटनेमुळे समृद्धी महामार्गाच्या सुरक्षेवर प्रश्न उपस्थित झाला आहेत. या मृतदेहाबाबत अथवा घटनेबाबत माहिती असल्यास तात्काळ संपर्क करावा, असे आवाहन वाशिम पोलिसांकडून करण्यात आले आहे. तपास पूर्ण झाल्यानंतरच मृतदेहाची ओळख आणि मृत्यूचे नेमके कारण स्पष्ट होईल, असे पोलिसांकडून सांगण्यात आले आहे. या प्रकरणाचा सध्या कसून तपास करण्यात येत आहे. हा मृतदेह कुणाचा आहे? घातपात आहे की अपघात? याचा तपास केला जात आहे.