मनोज जैयस्वाल, साम टीव्ही प्रतिनिधी

farmer earns 15 lakh from 2 acres using triple cropping : शेतीत रोज नवनवीन प्रयोग करून लाखो रुपयांची कमाई करता येते, हे राज्यातील एका प्रयोगशील शेतकऱ्याने सिद्ध करून दाखवले आहे. पारंपरिक शेती पद्धतीला छेद देत या शेतकऱ्याने आपल्या अवघ्या २ एकर जमिनीत एकाच वेळी तीन पिकांची (तिहेरी पीक पद्धती) यशस्वी लागवड केली आहे. विशेष म्हणजे, गेल्या ५ वर्षांपासून ते हा यशस्वी प्रयोग करत असून, मागील वर्षी त्यांनी या २ एकरांतून तब्बल १५ लाख रुपयांचे भरघोस उत्पन्न मिळवले आहे. एकाच शेतात योग्य नियोजन आणि तंत्रज्ञानाचा वापर करून घेतलेले हे उत्पन्न पाहून स्थानिक कृषी तज्ज्ञही अचंबित झाले असून, इतर शेतकऱ्यांसाठी हा फॉरम्युला एक उत्तम वस्तुपाठ ठरत आहे.

वाशीम जिल्ह्यातील पांडवउमरा येथील शेतकरी महादेव ढोबळे हे गेल्या पाच वर्षांपासून एकाच वेळी हळद, फ्लॉवर (गोभी) आणि सोयाबीन अशा तिहेरी पिकांची लागवड करून भरघोस उत्पन्न घेत आहेत. यंदाही त्यांनी आपल्या २ एकर शेतात हळद पिकात फ्लॉवर आणि सोयाबीनची आंतरपीक म्हणून लागवड केली असून, ही तिन्ही पिके सध्या चांगलीच बहरली आहेत.

गेल्या वर्षीही त्यांनी अशाच पद्धतीने दोन एकर क्षेत्रावर तब्बल १५ लाख रुपयांचे उत्पन्न मिळवले होते, अशी माहिती ढोबळे यांनी दिली. यामध्ये त्यांना ८० क्विंटल हळद आणि १२ क्विंटल सोयाबीनचे उत्पादन मिळाले होते, तर केवळ फ्लॉवरच्या विक्रीतून २ लाख रुपये मिळाले होते. यंदाही त्यांना अशाच प्रकारच्या भरघोस उत्पन्नाची अपेक्षा आहे.

केवळ एकाच पिकावर अवलंबून न राहता तीन पिकांची योग्य नियोजनबद्ध लागवड करून कमी क्षेत्रातही चांगले उत्पन्न घेता येते, हेच महादेव ढोबळे यांनी आपल्या या यशस्वी प्रयोगातून सिद्ध करून दाखवले आहे. शेतकरी महादेव ढोबळे यांचा हा यशस्वी प्रयोग इतर शेतकर्‍यांसाठी नक्कीच प्रेरणादायी आणि दिशादर्शक ठरणारा आहे. दिवसेंदिवस हवामानात होणारे बदल आणि पिकांच्या अनिश्चित भावाच्या पार्श्वभूमीवर, अशा प्रकारची 'तिहेरी पीक पद्धती' शेतीतील आर्थिक धोका कमी करून शेतकर्‍यांचे उत्पन्न शाश्वत ठेवण्यासाठी अत्यंत प्रभावी मार्ग ठरू शकते.