चेतन व्यास, वर्धा

Wardha Crime News: हिंगणघाट शहरात सुरु असलेल्या सहा ऑनलाईन जुगार अड्ड्यांवर स्थानिक गुन्हे शाखेचे पथक, क्राईम इंटेलिजन्स पथक आणि सायबर सेल पथकाने एकाचवेळी छापा टाकून लॅपटॉपसह जुगारातील इतर साहित्य असा एकूण तब्बल १४ लाख ३२ हजार ४७० रुपयांचा मुद्देमाल जप्त करीत २७ जुगाऱ्यांना अटक केली. ही कारवाई मंगळवारी रात्रीला करण्यात आली. (Latest Marathi news)

वर्धा (Wardha) जिल्ह्यातील हिंगणघाट शहरात ऑनलाईन जुगार सुरु असल्याची माहिती पोलिसांना मिळाली होती. त्यानुसार पोलीस अधीक्षक नुरुल हसन यांच्या निर्देशान्वये पोलिसांची (Police) विविध सहा पथके तयार करुन हिंगणघाट शहरातील आठवडी बाजार, विर भगतसिंग वॉर्ड, श्रीराम टॉकीज रोड या परिसरात एकाच वेळी छापे मारण्यात आले.

दरम्यान, आरोपी हे स्वत:च्या आर्थिक फायद्यासाठी ६ दुकानांमध्ये वेगवेगळया कंपनीच्या जुगाराच्या मशीन्स लावून तसेच संगणकावर आणि लॅपटॉपवर इंटरनेट व सॉफ्टवेअरच्या माध्यमातून ऑनलाईन जुगार व इतर प्रकारचे जुगार खेळताना व खेळविताना मिळून आले. (Maharashtra News)

पोलिसांनी सुमारे सहा दुकानातून ८ लाख ८० हजार रुपये किंमतीच्या ४४ जुगार खेळण्याच्या मशीन्स, पाच संगणक, एक लॅपटॉप, विविध कंपनीचे ३ लाख १९ हजार रुपयांचे २३ मोबाईल, ५ प्रिंटर आणि ३१ हजार हजार ४७० रुपये रोख रक्कम आणि इतर साहित्य २२ हजार असा एकूण १४ लाख ३२ हजार ४७० रुपयांचा मुद्देमाल जप्त केला.