चेतन व्यास, साम प्रतिनिधी

रेल्वे रुळावरून पायी जाणाऱ्या दोघांना रेल्वेची धडक बसली असून यात या दोघांचा मृत्यू झालाय. पाठी मागून येणाऱ्या रेल्वे गाडीची जबर धडक बसल्याने दोघांचाही यात मृत्यू झाला. ही दुर्देवी घटना आज दुपारच्या सुमारास वरुड रेल्वे स्थानकाजवळ घडली. याप्रकरणी सेवाग्राम पोलिसांनी घटनास्थळी धाव घेतली असून नागरिकांची मोठी गर्दी उसळली.

अर्जून परचाके (५२), भूजंग पाटील (३५) दोन्ही रा. वरुड अशी मृतांची नावे आहे. मृतक दोघेही हे वरुड रेल्वेस्थानक पासून सेलूकडे जाणाऱ्या रेल्वे रुळाने पायदळ जात होते. याचवेळी त्याच्या मागून आलेल्या रेल्वे गाडीने दोघांनाही धडक दिली. या धडकेनंतर हे दोघेही रेल्वेखाली आले. त्यात त्यांचा मृत्यू झाला. हा अपघात घडल्यानंतर घटनास्थळी सेवाग्राम पोलिसांची टीम दाखल झाली. दोघेही वरुड गावातीलच रहिवासी असल्याचं सांगितलं जात आहे.

अपघातस्थळी गावकऱ्यांची देखील मोठी गर्दी उसळली होती. पोलिसांकडून पंचनामा सुरू असून याची नोंद सेवाग्राम पोलिसांनी घेतलीय.

शिक्षकाने पत्नी मुलीसह संपवलं जीवन

परभणी जिल्ह्यातील गंगाखेडमध्ये धक्कादायक घटना घडली होती. शहरातील शिक्षक असलेल्या आई, वडील आणि मुलगी अशा तिघांनी रेल्वे रुळावर झोपून आत्महत्या केल्याची घटना घडली. ही घटना दुपारच्या वेळी घडली. या धक्कादायक घटनेमुळे गोदा काठ थरारला असून आत्महत्येचे कारण अजूनही कळू शकलेले नाहीये.

गंगाखेड शहरातील ममता कन्या माध्यमिक विद्यालयात शिक्षक म्हणून कार्यरत असलेल्या शिक्षकाने पत्नी आणि मुलीसह गंगाखेड रेल्वे स्टेशनपासून परभणीकडे जवळच जाणाऱ्या लोहमार्गावर गोदावरी नदी पुलाच्या पुढे रेल्वे रुळावर डोकं ठेवून झोपत कोळसा वाहतूक करणाऱ्या माल वाहतूक रेल्वेखाली आत्महत्या केली होती. घटनेची माहिती मिळताच पोलिसांनी घटनास्थळी धाव घेऊन तिघांचेही मृतदेह शवविच्छेदनासाठी उपजिल्हा रुग्णालयात पाठवले होते.