चेतन व्यास

वर्धा : जिल्‍ह्यात सकाळपासून जोरदार पाऊस सुरू आहे. यामुळे नदी, नाल्‍यांना पुर आला आहे. पुराचे पाणी पुलावरून वाहत असताना देखील धोकादायक प्रवास केला जात आहे. विशेष म्‍हणजे प्रवाशांनी फुल्‍ल भरलेली राज्‍य परिवहन महामंडळाची बस (ST Bus) पुराच्‍या पाण्यातून काढण्याची रिस्‍क चालक घेत आहे. (Wardha News heavy Rain)

वर्धा (Wardha) जिल्ह्याला आज सकाळपासून दुपारपर्यंत पावसाने चांगलेच झोडपून काढले आहे. सकाळपासून बरसलेल्या पावसामुळे (Heavy Rain) जिल्ह्यातील नदी, नाल्यांच्या पाणी पातळीत वाढ झाली आहे. अश्यातच आर्वी तालुक्याच्या वर्धमनेरी येथील नाल्याला पूर आल्याने पुलावरून पाणी असल्याने आर्वी वर्धमनेरी मार्ग वाहतुकीसाठी बंद झाला आहे. या मार्गांवरील वाहतूक बंद असल्याने अनेक वाहने वाहतूक सुरळीत होण्याची वाट पाहत आहे.

प्रवाशांच्‍या जीवाशी खेळ

पुलावरून पाणी वाहत असताना देखील काही बस चालकांसह इतर चारचाकी वाहन चालक पुलावरून पाणी असतांना सुद्धा जीवघेणा प्रवास करत आहे. प्रत्येक बसमध्ये मोठ्या प्रमाणात प्रवासी असून सुद्धा बस चालक प्रवश्यांच्या जीवाशी खेळ करताना दिसत आहे.