Virar News: विरारमध्ये धक्कादायक घटना घडली आहे. विरारमध्ये निर्माणाधीन इमारतीची भिंत कोसळून चार कामगार ढिगाऱ्याखाली अडकल्याची घटना घडली. या दुर्घटनेत आता तीन महिला कामगारांचा मृत्यू झाल्याची माहिती समोर आली आहे. तर इतर कामगारावर रुग्णालयात उपचार सुरू आहे.

मिळालेल्या माहितीनुसार, विरारच्या पूर्व भागातील सूर्य किरण या निर्माणाधीन इमारतीची भिंत कोसळल्याची घटना घडली. इमारतीची प्रमुख भिंत कोसळली. ही भिंत कोसळल्याने यात ४ कामगार ढिगाऱ्याखाली अडकले. हे कामगार या भिंतीखाली काम करत होते.

घटनेची माहिती मिळताच अग्निशमन दलाचे जवान घटनास्थळी पोहोचले. या कामगारांनी तातडीने अडकलेल्या कामगारांना ढिगाऱ्यातून बाहेर काढले. त्यानंतर या कामगारांना रुग्णालयात दाखल केले.

भिंत कोसळल्याने कामगारांची प्रकृती चिंताजनक सांगण्यात येत होती. या कामगारांवर रुग्णालयात उपचार सुरू होते. मात्र, उपाचारादरम्यान ढिगाऱ्याखाली अडकलेल्या तीन महिला कामगारांचा मृत्यू झाला. या घटनेने मृत कामगारांच्या कुटुंबावर दु:खाचा डोंगर कोसळला आहे. या घटनेने परिसरात एकच खळबळ उडाली आहे.