योगेश काशिद, साम प्रतिनिधी

बीडमध्ये विलास घुले खून प्रकरण तापलंय. खासदार बजरंग सोनवणे यांचा मुलगा सौरव सोनवणे याच्यावर घुले कुटुंबाने गंभीर आरोप केले आहेत. सौरव सोनवणेच्या अटकेच्या मागणीसाठी घुले कुटुंबाने बीड जिल्हाधिकारी कार्यालयासमोर आमरण उपोषण सुरू केलंय. माझ्या मुलाला न्याय द्या, सौरभ बजरंग सोनवणे याला अटक करा, अन्यथा आम्ही इथंच आत्महत्या करू, असा टोकाचा इशारा मयत विलास घुलेच्या आईसह भावाने दिलाय. तर घुलेच्या टाकळी गावच्या सरपंचाने देखील आक्रमक पवित्रा घेतला असून जोपर्यंत घुले कुटुंबाला न्याय मिळत नाही, तोपर्यंत आम्ही येथून उठणार नाहीत, असा पवित्रा घेतलाय.

मुख्यमंत्र्यांनी एकाला एक न्याय आणि दुसऱ्या एक न्याय, असं करू नये, लहान जात असली म्हणून न्याय मिळणार नाही का? असा देखील सवाल त्यांनी केलाय. माझा मुलगा जाऊन ४० दिवस झाले, मात्र अद्याप न्याय मिळाला नाही. पोलिसांनी मुख्य आरोपीला अटक केली नाही. आम्ही न्याय मिळावा म्हणून मुंबईत निवेदन देण्यासाठी ६ दिवस थांबलो.

मात्र प्रशासनाने दखल घेतली नाही. तुम्ही दुसऱ्या १०० जणांना अटक केली तरी काय उपयोग, तुम्ही मुख्य आरोपीला आणखी आम्हाला मारायला बाहेर ठेवलय का? असा सवाल मयत विलास घुलेच्या आईने केलाय. जर आरोपीला अटक झाली नाही, आम्हाला न्याय मिळाला नाही तर आम्ही सर्व कुटुंब आत्महत्या करू, असा इशारा देखील त्यांनी दिला आहे.

माझा भाऊ जखमी असताना त्याने सौरव सोनवणे याचे नाव घेतले आहे. त्यानेच हे करायला सांगितलं असे विलास घुलेच्या भावाने सांगितलंय. जे साक्षीदार आहेत त्यांनी देखील आपल्या जबाबात नाव दिली आहेत. मग पोलीस का कारवाई करत नाहीत. यांना आम्ही मेल्यावर जग येणार का? असा संतप्त सवाल देखील यावेळी रमेश घुले यांनी केला आहे.