अक्षय गवळी, अकोला

नांदेडमधील गँगवॉरची घटना ताजी असतानाच आता अकोल्यातील कौलखेड भागात एका टोळीने काही नागरिकांना चाकू भोसकून दहशत निर्माण केली. या दुर्घटनेत दोघांची प्रकृती गंभीर आहे. धक्कादायक म्हणजे हे तरुण धुरंदर टू चित्रपट बघून आल्यानंतर नशेत त्यांनी हे कृत्य केल्याचे समोर आले आहे. याप्रकरणी या टोळीवर गुन्हा दाखल करण्यात आला आहे. या दिवसाढवळ्या घडलेल्या घटनेने परिसरात खळबळ उडाली आहे.

अकोल्यातील कौलखेड भागातील श्रद्धा नगर ३ येथे एका टोळीने दिवसाढवळ्या धुमाकूळ घातला. मिळालेल्या माहितीनुसार ही टोळी नुकतीच धुरंदर २ हा चित्रपट पाहून आली होती. शिवाय हे टोळीतले गुंड नशेत होते.

या गुंडानी चाकूने नागरिकांवर हल्ला केला, तर काहींवर पाईपने हल्ला केला. या हल्ल्यात अभिलाष अरविंद हिंगे (वय ३२), रवि उर्फ छोटू ठाकरे (वय २४) हे गंभीर जखमी झाले. अभिलाष अरविंद हिंगे यांची प्रकृती चिंताजनक आहे. त्यांच्यावर सध्या खासगी रुग्णालयात शस्त्रक्रिया सुरू आहे.

घटनेनंतर परिसरात एकच खळबळ उडाली असून नागरिकांमध्ये भीतीचे वातावरण आहे. घटनेची माहिती मिळताच खदान पोलीस आणि एलसीबीचे पथक तात्काळ घटनास्थळी दाखल झाले. आरोपींना अटक करण्यासाठी पोलीसांकडून शोधमोहीम सुरू करण्यात आली आहे. या घटनेनंतर कौलखेड परिसरात पोलीस बंदोबस्त वाढवण्यात आला. अकोल्यातील खदान पोलिसांच्या दुर्लक्षित धोरणामुळे शहरातील कौलखेड आणि इतर भागात नशेखोर तरुणांची दहशत वाढली आहे.