Nagpur News : नागपूरमध्ये वंचित बहुजन आघाडीचे कार्यकर्ते आणि संभाजी भिडे यांचे समर्थक आमने-सामने आले. श्री शिवप्रतिष्ठानचे संभाजी भिडे यांचं आज नागपुरात कार्यकर्ता मार्गदर्शन शिबीर आहे.

मात्र संभाजी भिडे नागपुरात येणार म्हणून वंचित बहुजन आघाडीने आक्रमक पवित्रा घेत विरोध केला. कोणताही अनुचित प्रकार घडू नये म्हणून पोलिसांचा मोठा बंदोबस्त याठिकाणी ठेवण्यात आला आहे.

गीता मंदिरमध्ये संभाजी भिडे यांचं शिबीर आयोजित करण्यात आलं होतं. वंचित बहुजन आघाडीने संभाजी भिडे यांचा विरोध करण्याचा इशारा दिला होता. यामुळे शिबीर आयोजित करण्यात आलेल्या ठिकाणी मोठ्या प्रमाणात पोलीस उपस्थित आहेत.

संभाजी भिडे कार्यक्रमस्थळी दाखल होण्याआधीच वंचित बहुजन आघाडीचे कार्यकर्ते आणि संभाजी भिडे यांचे समर्थक आमने-सामने आले. संभाजी भिडे यांचा कार्यक्रम असलेल्या ठिकाणच्या बाहेर वंचितच्या कार्यकर्त्यांनी काळे झेंडे दाखवले. तसेच संभाजी भिडेंना परत जाण्याची मागणी केली. संभाजी भिडे यांच्या कार्यकर्त्यांकडूनही जय श्रीरामच्या घोषणा देण्यात आल्या. (Latest Marathi News)