उस्‍मानाबाद : शासकीय वाहनांवर अंबर दिवा बसविण्यास मनाई आहे. असे असतानाही उस्मानाबादच्या तहसीलदारांनी वाहनावर अंबर दिवा लावला. यामुळे वाहतूक शाखा अधिकाऱ्याने नियमांचे उल्लंघन केल्याप्रकरणी तहसीलदारांना ५०० रुपयांचा दंड केला आहे. (Tajya Batmya)

प्रशासकीय अधिकाऱ्यांना वाहनावर अंबर दिवे लावण्यास मनाई आहे. असे असतानाही उस्मानाबादचे तहसीलदार गणेश माळी यांनी गाडीवर अंबर दिवा लावून फिरत असल्याची माहिती नागरिकांनी वाहतूक शाखेस कळविली होती. वाहनाचे फोटोही पाठविले. या माहितीची खातरजमा करून वाहतूक अधिकाऱ्यांनी (Traffic Police) वाहनाची पाहणी केली.

पाचशे रूपयांची फाडली पावती

वाहनाची पाहणी केली त्‍यावेळी वाहनावर अंबर दिवा नव्हता. मात्र, गाडीवर दिवा असलेला फोटो होता. वाहतूक शाखेकडे असलेल्या मशीनवर अंबर दिव्यासंदर्भात कारवाई करण्याची तरतूद नाही. उपप्रादेशिक परिवहन अधिकाऱ्यांचे मार्गदर्शन घेतल्यानंतर पावती फाडून वाहतूक शाखेने ५०० रुपये दंड वसूल केला.