उल्हासनगर : रस्त्यावर जाताना धक्का लागल्याने एका व्यक्तीला टोळक्याने लाथा बुक्क्यांनी मारहाण केल्याची घटना (Ulhasnagar) उल्हासनगरमध्ये घडली. या मारहाणीची संपूर्ण घटना सीसीटीव्ही (CCTV) कॅमेरात कैद झाली आहे. या घटनेत मारहाण झालेल्या व्यक्तीचा उपचार दरम्यान मृत्यू झाला. याप्रकरणी विठ्ठलवाडी पोलीस ठाण्यात गुन्हा दाखल करण्यात आला आहे. (Live Marathi News)

उल्हासनगर कॅम्प नंबर ४ परिसरात राहणारे राजेश कुकरेजा हे रविवारी रात्रीच्या सुमारास आपल्या घरी होते. या दरम्‍यान सतरामदास हॉस्पिटलजवळ राजेश कुकरेजा यांचा काही तरुणाला धक्का लागला. या रागातून या टोळक्याने राजेश यांना लाथा बुक्क्यांनी मारहाण करण्यात आली. या हाणामारीची संपूर्ण घटना सीसीटीव्ही कॅमेरात कैद झाली आहे. त्यानंतर राजेश यांना उपचारासाठी उल्हासनगरच्या एका खाजगी रुग्णालयामध्ये दाखल करण्यात आले होते.

मुलाच्‍या फिर्यादीवरून गुन्‍हा दाखल

राजेश कुकरेजा यांची प्रकृती गंभीर असल्याने त्यांना मुंबईच्या केईएम रुग्णालयात हलवण्यात आलं होते. मात्र उपचारादरम्यान राजेश यांचा मृत्यू झाला आहे. याप्रकरणी राजेश यांचा मुलगा तरुण याने विठ्ठलवाडी पोलीस ठाण्यात बाळा उर्फ समीर गायकवाड, गौरव गोडिया, मनीष दुसेजा यांच्या विरोधात गुन्हा दाखल केला असून आरोपींचा शोध पोलीस घेत आहे.