नवनाथ बन यांनी दावा केला की, उद्धव ठाकरे विधान परिषद निवडणूक लढले तर त्यांच्या गटातच मतभेद उफाळून येऊ शकतात. काही आमदार क्रॉस व्होटिंग करण्याची शक्यता असून, त्यामागे संजय राऊत यांच्या गटाची रणनीती असल्याचा आरोप त्यांनी केला. त्यामुळे निवडणुकीत अनपेक्षित निकाल लागू शकतो. विरोधकांमधील अंतर्गत संघर्ष आता उघडपणे समोर येत असल्याचं त्यांनी म्हटलं.

नवनाथ बन म्हणाले की, उद्धव ठाकरे यांच्याकडे 6 वर्षे विधानपरिषद होती त्या कार्यकाळात त्यांनी महाराष्ट्राच्या हिताचा एकही मुद्दा विधानपरिषदेत मांडला नाही. त्यांची जर विधानपरिषदेतील उपस्थिती बघितली तर ती 50 टक्के सुद्धा नाही. हे पद जनतेचा आवाज उठवण्यासाठी असते ती अडवण्याचे काम उद्धव ठाकरे करणार आहेत का? असा सवाल बन यांनी केला आहे.

मराठीची लिपि माहीत नाही मग संपादक कशाचे?

नवनाथ बन यांनी संजय राऊत यांच्या संपादकीय पात्रतेवर थेट प्रश्न उपस्थित केला. मराठी भाषेचं मूलभूत ज्ञान नसलेला व्यक्ती मराठी दैनिकाचा संपादक म्हणून काम करू शकतो का, असा थेट सवाल त्यांनी उपस्थित केला. राऊत यांनी ‘सामना’च्या कार्यकारी संपादक पदाचा राजीनामा द्यावा, अशी मागणी करत त्यांनी म्हटलं की, संपादक हा समाजाला दिशा देणारा असतो. परंतु ज्याला भाषेचं भान नाही, तो समाजाला काय दिशा देणार? उद्धव ठाकरे यांनी देखील त्यांना मुख्य संपादक न करता कार्यकारी संपादक ठेवणं, यामागे हेच कारण असावं, असा टोला त्यांनी लगावला.

भाषेच्या नावाखाली गुंडगिरी सहन होणार नाही”

पुढे ते म्हणाले, महाराष्ट्रात मराठी भाषा शिकणं आवश्यक आहे आणि प्रत्येकाने स्थानिक भाषेचा आदर केला पाहिजे. मात्र मराठीच्या नावाखाली धमकावणं, मारहाण करणं किंवा दहशत निर्माण करणं अजिबात सहन केलं जाणार नाही. भाषा ही संवादाचं माध्यम आहे, संघर्षाचं नाही, हे लक्षात ठेवणं आवश्यक आहे. गुजरात, कर्नाटक किंवा उत्तर भारतातही स्थानिक भाषा महत्त्वाची असते, पण तिथे कुणालाही मारहाण करून भाषा शिकवली जात नाही. महाराष्ट्रात उद्योग, रोजगार किंवा व्यवसायासाठी येणाऱ्या प्रत्येकाने मराठी शिकावी, ही अपेक्षा आहे; मात्र त्यासाठी कायदेशीर आणि सकारात्मक मार्गाने प्रयत्न व्हायला हवेत, असं नवनाथ बन यांनी स्पष्ट केलं.