निवडणूक आयोगाविरोधात विरोधकांनी एकीची वज्रमूठ आवळलीय. मात्र या चर्चेच्या केंद्रस्थानी आहेत ते म्हणजे ठाकरे बंधू. होय. राज ठाकरे आणि उद्धव ठाकरे. ही दृश्य पाहा मुख्य निवडणूक अधिकाऱ्यांच्या भेटीआधीच विरोधी पक्षाचे नेते शिवालयात एकत्र आले आणि येथेच सगळ्यांचं लक्ष वेधून घेतलं ते ठाकरेंच्या कपड्यांनी राज ठाकरे आणि उद्धव ठाकरेंनी एकाच रंगाचे कपडे घातले होते. एवढंच नाही तर शिवालय ते मंत्रालय हा प्रवासही ठाकरे बंधूंनी एकाच गाडीतून केला.

एवढंच नाही तर निवडणूक आयोगाला खिंडीत गाठण्यासाठी राज ठाकरे आणि उद्धव ठाकरे शेजारी शेजारीच बसले आणि मुख्य निवडणूक अधिकाऱ्यांवर प्रश्नांची सरबत्ती केली. सलग दुसऱ्या दिवशीही ठाकरे बंधू निवडणुक आयोगाच्या बैठकीसाठी एकत्र आले. मात्र आता फक्त सिनियर ठाकरेच नाही तर ज्युनियर ठाकरे म्हणजेच आदित्य आणि अमित ठाकरेंही या बैठकीला सोबत आले. विशेष म्हणजे आजूबाजूला बसलेल्या दोघांचा संवाद सर्वांचं लक्ष वेधून घेत होता.

खरंतर ठाकरे फक्त राजकीय आखाड्यातच एकत्र आलेत असं नाही. तर त्यांच्या कुटुंबांचंही घट्ट मनोमिलन झाल्याचं दिसतंय. राज ठाकरेंच्या संकल्पनेतून साजरा करण्यात येत असलेल्या मनसेच्या यंदाच्या दिपोत्सवाचं उद्घाटनही उद्धव ठाकरेंच्या हस्ते करण्यात येणार आहे. त्यामुळे महापालिका निवडणूकांच्या समीकरण जुळवण्यासाठी ठाकरे दिवाळीआधीच युतीच्या घोषणेचा बार उडवणार का? याकडे राज्याचं लक्ष लागलंय