मनोज भांडेकर

Gadchiroli News: सिरोंचा तालुक्याला लागूनच असलेली गोदावरी नदी दुथडी भरून वाहत आहे. या नदीत आंघोळीसाठी उतरलेल्या दोन युवकांचा गोदावरी नदीपात्रात बुडून मृत्यू झाल्याची घटना नगराम नदी घाटावर आज रविवारला घडली. सुमन राजू मंसेट्टी आणि हिमांशू मून अशी मृतकांची नावे आहेत. (Latest Marathi News)

मिळालेल्या माहितीनुसार, हिमांशू मून हा नागपूर येथून आपल्या काही मित्रांसह कार्यक्रमासाठी सिरोंचा तालुक्यातील आसरअल्ली येथे गेला होता. दरम्यान, आज सकाळी तो आपल्या मित्रांसह सुमन मुंसेट्टी याला भेटण्यासाठी सिरोंचापासून ८ किमी अंतरावरील चिंतलपल्ली येथे गेला. येथून हिमांशू व सुमन तसेच कार्तिक पडाला, नलिन पडाला व रंजित पडाला हे पाच जण गोदावरी नदीवरील नगरम घाटाकडे आंघोळीचा बेत करून निघाले. (Gadchiroli Latest News)

येथे गेल्यानंतर आंघोळीसाठी सर्वजण नदीपात्रात उतरले. पावसामुळे गोदावरी नदीचे पात्र दुथडी भरून वाहत असल्याने सुमन मंसेट्टी व हिमांशू मून व अन्य एकजण खोल पाण्यात बुडू लागले. मात्र अन्य एक व इतर दोघे असे तिघेजण कसेबसे पाण्याबाहेर निघाले. मात्र पाण्याच्या प्रवाहाने हिमांशू व सुमन दूर वाहत जाऊन त्यांचा मृत्यू झाला. पुढील तपास सिरोंचा पोलीस करीत आहे

इंद्रायणी नदीत दोन तरुण बुडाले

पिंपरी चिंचवडमधील इंद्रायणी नदीमध्ये दुर्दैवी घटना घडली. शनिवारी इंद्रायणी नदीमध्ये आंघोळीसाठी गेलेले दोन तरुण अचानक बेपत्ता झाल्याची घटना घडली. हे तरुण अद्याप सापडले नाही. त्यामुळे अग्निशमन दलाकडून या तरुणांचा शोध सुरु आहे.

शक्तिमान कुमार (२० वर्षे) आणि सोनू कुमार बैठा (२० वर्षे) असे या दोन तरुणांचे नाव आहे. दोन्ही तरुणांचा नदीच्या पाण्याचा अंदाज न आल्यामुळे त्यांचा बुडून मृत्यू झाल्याचा अंदाज वर्तवला जात आहे.