संजय डाफ, नागपूर

Nagpur Airport: विमानाचे इमर्जन्सी लॅंडिंग (Plane Emergency Landing) करुन नागपूरमध्ये उपचार सुरु असलेल्या दोन वर्षांच्या चिमुकलीचा अखेर मृत्यू झाला आहे. या चिमुकलीवर नागपूर येथील किंग्सवे हॉस्पिटलमध्ये (kingsway hospital) उपचार सुरु होते. पण अखेर तिची मृत्यूशी झुंज अपयशी ठरली. उपचार सुरु असताना आज अचानक चिमुकलीची प्रकृती गंभीर झाली आणि तिचा मृत्यू झाला.

मिळालेल्या माहितीनुसार, मृत्यू झालेल्या चिमुकलीवर ८ ऑगस्ट रोजी बंगळुरू येथे कार्डीयाक सर्जरी झाली होती. त्यानंतर ती बंगळुरूवरुन दिल्लीला जाणाऱ्या विमानातून प्रवास करत होती. प्रवासादरम्यान अचानक या चिमुकलीची प्रकृती बिघडली. सुदैवाने या विमानातून ५ डॉक्टर प्रवास करत असल्यामुळे या चिमुकलीचा जीव वाचला होता.

चिमुकलीला सायनोटिक आजार होता. प्रवासादरम्यान विमानातच ती बेशुद्ध झाली होती. विमानातील डॉक्टर उपचार करत असताना तिला हृदयविकाराचा झटका आला होता. त्यामुळे या विमानाचे नागपूर एअपोर्टवर इमर्जन्सी लँडिंग करण्यात आले होते. त्यानंतर तिला उपचारासाठी किंग्सवे हॉस्पिटलमध्ये दाखल करण्यात आले होते.

या हॉस्पिटलमध्ये बालरोग तज्ज्ञांच्या १० जणांची टीम तिच्यावर उपचार करत होती. या चिमुकलीला व्हेंटिलेटरवर ठेवण्यात आले होते. पण अचानक या चिमुकलीची प्रकृती गंभीर झाली आणि तिचा उपचारादरम्यान मृत्यू झाला. बरेच प्रयत्न करून देखील चिमुकलीचा मृत्यू झाला. चिमुकलीच्या मृत्यूमुळे तिच्या कुटुंबीयांना मोठा धक्का बसला आहे.