नवी दिल्ली : छत्रपती शिवाजी महाराज यांची आज ३९५ वी जयंती आहे. महाराष्ट्रासह देशभरातील विविध ठिकाणी देखील शिवजयंती मोठ्या उत्साहात साजरी करण्यात येत आहे. शिवजयंतीच्या निमित्ताने काँग्रेसचे नेते राहुल गांधी यांनी देखील एक्सवर पोस्ट करत छत्रपती शिवाजी महाराजांना अभिवादन केले. मात्र शिवजयंतीनिमित्त ट्विट करताना राहुल गांधी यांनी छत्रपती शिवाजी महाराजांना श्रद्धांजली वाहिल्याचा दावा भाजपचे नेते अतुल भातखळकर यांनी केला आहे.

राहुल गांधीच्या या पोस्टनंतर विरोधकांनी त्यांना धारेवर धरलं आहे. त्याचदरम्यान, शिवसेनेचे (शिंदे गट) नेते तथा राज्याचे परिवहन मंत्री प्रताप सरनाईक यांनी देखील राहुल गांधी यांच्या पोस्टवर प्रतिक्रिया दिली आहे. राहुल गांधींना छत्रपती शिवाजी महाराजांबद्दल काही माहिती नसावं. गांधी परिवाराने केवळ नेहरू, गांधी आणि काँग्रेस विषयी बोलावं. देशातील आराध्य दैवतांबाबत त्यांनी काही बोलू नये त्यांना काही माहिती नाही. राज्यासाठीच नव्हे तर देशासाठी छत्रपती शिवरायांनी काय केलं आहे, हे राहुल गांधींना माहिती नाही, असं प्रताप सरनाईक म्हणाले.

दरम्यान, राहुल गांधी यांनी छत्रपती शिवाजी महाराजांच्या जयंतीनिमित्त केलेल्या ट्विट करताना चक्क श्रद्धांजली अर्पण केली आहे. हा महाराष्ट्रीयन लोकांचा आणि देशभरातील लोकांचा अपमान आहे. जयंतीच्या दिवशी आदरांजली व्यक्त करतात, पण राहुल गांधी हे नेहमी देशातील आणि महाराष्ट्रातील महापुरुषांच्या विषयी कळत-नकळत अनादर व्यक्त करत असतात, त्यातील हा प्रकार आहे, अशी टीका अतुल भातखळकर यांनी केली. राहुल गांधी यांनी ट्विट मागे घ्यावं, असंही अतुल भातखळकर यांनी म्हटलं आहे.