नागपूर: बलात्कार करायचा असेल तर वारांगणांवर करा, मात्र, सुसंस्कृत घरातील महिलांवर बलात्कार करू नका, असं वक्तव्य राष्ट्रवादी महिला अर्बन सेलच्या अध्यक्षा ज्वाला धोटे यांनी केलं आहे. नागपूर पोलीस आयुक्तांनी वारांगणांवर केलेल्या कारवाईचा निषेध करण्यासाठी आज जागतिक महिला दिनी (Women's Day 2022) काळा दिवस पाळून आंदोलन करण्यात आलं. यावेळी त्यांनी हे वक्तव्य केलं.

पोलिसांनी नागपुरातील (Nagpur) गंगा जमुना या रेड लाईट एरियावर कारवाई केली होती. तसेच हा परिसर सील करण्यात आला होता. तेव्हापासून राष्ट्रवादी अर्बन सेलच्या अध्यक्षा ज्वाला धोटे या आक्रमक झाल्या आहेत. पोलीस आयुक्तांनी एका ६० वर्षीय महिलेवर तडीपारीची कारवाई केली. त्याचा निषेध करण्यासाठी वारांगणांसह ज्वाला धोटे यांनी मानवी साखळी करत आंदोलन केले. यावेळी त्यांनी महाविकास आघाडी (Mahavikas Aghadi) सरकारच्या विरोधात घोषणाबाजी देखील केली.

''माझ्या समस्त माता-बहिणी वारांगणा लोकांना आवाहन करतात की, बलात्कार करायचा असेल, स्वतःच्या शरीराची भूक भागवायची असेल तर आमच्याकडे या. परंतु, सुसंस्कृत घरातील महिलांवर, मुलींवर वाईट नजर टाकू नका. नराधमांची भूक भागवण्यासाठी आम्ही आहोत. पण, सुसंस्कृत घरातील महिलांकडे वाईट नजरेनं पाहू नका'', असं आवाहन माझ्या वारांगण महिला करत आहेत, असं ज्वाला धोटे यावेळी म्हणाल्या.