बीड - परळी (Parali) शहरातील अरुणोदय मार्केटमधील व्यापारी प्रवीण मालेवार यांनी स्वतःच्या दुकानात गळफास घेऊन आत्महत्या केल्याची घटना, दोन दिवसांपूर्वी 18 तारखेला उघडकीस आल्याने खळबळ उडाली होती. तर ही आत्महत्या सावकाराच्या जाचास कंटाळून केल्याचा प्रकार समोर आला आहे. (Beed Crime News)

हे देखील पहा -

मयत प्रवीण मालेवर यांच्या पत्नी मेघा मालेवार यांनी पोलिसात दिलेल्या फिर्यादीत म्हटलंय की, 2013 साली प्रवीण यांनी २५ लाखांना घर खरेदी केले होते. यावेळी त्यांच्यावर खूप सारे कर्ज झाले होते. 2018 साली घर विकूनही पूर्ण कर्ज फिटले नाही. मुद्दल आणि व्याजासह पैसे देऊनही सावकारांनी अधिक रकमेसाठी त्यांच्याकडे तगादा लावल्याने ते तणावात होते.

गोपाळ मुंडे, सुभाष मुंडे, पारसेवार, मधुकर साखरे, विष्णु मुंडे, मयुर हरगावकर, शामराव कातकडे, प्रकाश चिद्रवार, संजय मुळे, अघाव मॅडम, अग्रवाल ग्लास, कृष्णा भांगे, बालाजी मुंडे, बाबर भाई, शिव ओपळे आणि बोकन सोनार यांचे कर्ज फेडूनही ते त्रास देत असल्याबद्दल प्रवीण यांनी हिशोबाची चिट्ठी लिहून गुरुवारी रात्री सांगितले होते.

मला खूप वैताग आला आहे, हे लोक मला सोडणार नाहीत, असेही प्रवीण म्हणाले. त्यानंतर शुक्रवारी सकाळी 6 वाजता घरातून बाहेर पडून प्रवीण यांनी दुकानात जाऊन गळफास लावून आत्महत्या केली. या दिलेल्या फिर्यादीवरून, परळी शहर ठाण्यात सर्व 16 सावकारांवर प्रवीण मालेवार यांना आत्महत्येस प्रवृत्त केल्याचा गुन्हा नोंदवण्यात आला आहे. दरम्यान यामुळं अव्वाच्या सव्वा व्याज घेणाऱ्या सावकारांमध्ये चांगलीच खळबळ उडाली आहे.

Edited By - Shivani Tichkule