अकोला : शिवसेना नेमकी कुणाची, धनुष्यबाण नेमका कुणाला मिळणार? यावर आज केंद्रीय निवडणूक आयोगासमोर सुनावणी झाली. या सुनावणीदरम्यान, ठाकरे आणि शिंदे गटाकडून जोरदार युक्तीवाद करण्यात आले. निवडणूक आयोगाने दोन्ही बाजूंचे युक्तीवाद ऐकून घेतले. आता या प्रकरणाची पुढील सुनावणी येत्या शुक्रवारी म्हणजेच २० जानेवारीला होणार आहे. (Latest Marathi News)

दरम्यान, ज्येष्ठ कायदेतज्ज्ञ उज्ज्वल निकम यांनी याबाबत प्रतिक्रिया देताना एक मोठं विधान केलं आहे. खरी शिवसेना नेमकी कुणाची? धनुष्यबाण हे पक्षचिन्ह कुणाला मिळणार? याचा निर्णय लागण्यासाठी आणखी काही दिवस लागू शकतात. असं उज्ज्वल निकम (Ujjwal Nikam) यांनी म्हटलं आहे.

इतकंच नाही तर, निवडणूक आयोगाला फक्त पक्षाची घटना आणि निवडून आलेले लोकप्रतिनिधी कोणाच्या बाजूने आहेत ही बाब तपासावी लागेल. या सगळ्या प्रक्रियेला वेळ लागत असेल तर कदाचित आयोग शिवसेनेचे राजकीय चिन्ह धनुष्यबाण हे कायमचं गोठवू शकते, अशी शक्यता उज्ज्वल निकम यांनी व्यक्त केली आहे. (Maharashtra Political News)

ज्येष्ठ कायदेतज्ज्ञ उज्ज्वल निकम हे अकोल्यात आले होते यावेळी त्यांनी हे मोठं विधान केलं आहे. ते म्हणाले, ज्यावेळेला एखाद्या राजकीय पक्षांचे राजकीय चिन्ह किंवा त्या राजकीय पक्षाच्या चिन्हाबाबत प्रश्न उपस्थित होतो, त्यावेळी निवडणूक आयोग प्रामुख्याने संबंधित राजकीय पक्षाची घटना आणि त्या घटनेनुसार त्या राजकीय पक्षाचे पदाधिकारी निवडून आले आहेत का? ते कोणाच्या बाजूने आहेत? ही बाब तपासते.

त्यानंतर राजकीय पक्षाचे आमदार किंवा स्थानिक स्वराज्य संस्थांचे पदाधिकारी हे कोणत्या गटाचे जास्त आहेत हे देखील तपासले जाते. या सगळ्या प्रक्रियेला जर वेळ लागत असेल तर कदाचित केंद्रीय निवडणूक आयोग शिवसेनेचे राजकीय चिन्ह धनुष्यबाण हे कायमचं गोठवू शकते. त्याची शक्यता देखील नाकारता येणार नाही, असं उज्ज्वल निकम यांनी म्हटलं आहे.

Edited By - Satish Daud