लातुर : लातुर जिल्ह्यातील अहमदपूर तालुक्यातील मौजे टेंभुर्णी येथील दोन दिवसापासून बेपत्ता झालेल्या युवकाचा मृतदेह आज गावातील विहिरीत आढळला असून, शारीरिक व मानसिक त्रास देत घातपात केल्याचा आरोप नातेवाईकांनी केला आहे. टेंभुर्णी येथील 19 वर्षीय जेसीबी चालक कोंडीबा श्रीपती कासले याचे गावातील एका मुली सोबत प्रेम संबध होते. यातून या पुर्वी दोन्ही कुटुंबात दोन वेळा वाद झाला होता. कोंडीबा कासले 16 ऑक्टोबर रोजी घरा बाहेरील शेडमधे एकटाच झोपला होता. दरम्यान, कोंडीबाचा भाऊ रात्री एक वाजता घरी आला असता कोंडीबा झोपलेल्या ठिकाणी फक्त चप्पल व मोबाईल आढळून आल्याने त्यांनी घरात झोपलेल्या माणसांना ही माहिती दिली.

हे देखील पहा :

या प्रकरणी 17 ऑक्टोबर रोजी कोडिंबाच्या नातेवाईकांनी हरवल्याची तक्रार अहमदपूर पोलिसात दिली. दरम्यान, आज कोंडीबाचा मृतदेह मौजे टेंभुर्णी शिवारातील विहिरीत आढळून आला.  कोंडीबाच्या नातेवाईकांनी संशयित आरोपी अटक झाल्याशिवाय अंत्यविधी करणार नसल्याची भूमिका घेत मृतदेह ग्रामीण रूग्णालयासमोर वाहनात ठेवला.

या प्रकरणी मयताची आई शशीकला कासले यांच्या फिर्यादीवरून देवानंद मनोहर गायकवाड, सुहास खंडेराव गायकवाड, एकनाथ निवृत्ती गायकवाड सर्व ( रा. टेंभुर्णी.ता.अहमदपूर) अक्षय जळबा गायकवाड ( रा. मोहिजा परंडा ता. कंधार ) विश्वंभर गणपती मसुरे, मुलीचा मावस भाऊ (रा.हाळी ता.उदगीर) यांच्या विरोधात अहमदपूर पोलीसांत गुन्हा नोंद झाला असून तीन आरोपीस अटक करण्यात आली आहे. युवकाच्या मृत्यूस कारणीभूत ठरलेल्या आरोपी विरोधात गुन्हा नोंद व आरोपींना अटक होई पर्यंत शवविच्छेदन व अंतविधी करणार नसल्याची भूमिका मृताच्या नातेवाईकांनी घेतल्याने कांही काळ तणाव निर्माण झाला होता. गुन्हा नोंद व आरोपींना अटक झाल्यावर मृतदेह गावी नेऊन अंत्यविधी करण्यात आला.

Edited By : Krushnarav Sathe