चेतन व्यास

Teacher Pension: जुनी पेन्शन योजना लागू करा या मागणी करीता डीसीपीएस/ एनपीएस हटाव पेन्शन बचाव कृती समिती व शिक्षक तक्रार निवारण समितीच्या वतीने शिक्षक नेते अजय भोयर यांच्या नेतृत्वात सोमवारी अभिनव आंदोलन करण्यात आले. वर्धेच्या बॅचलर रोड येथील संपर्क कार्यालयात जुनी पेन्शन योजना लागू करा आणि एनपीएस योजना बंद करा या मागणीचे पत्र शिक्षकांनी स्वतःच्या रक्ताने लिहून प्रधानमंत्री आणि मुख्यमंत्री यांना पाठवले आहे. (Latest Marathi News)

मिळालेल्या माहितीनुसार, १ नोव्हेंबर २००५ नंतर नियुक्त शिक्षक व कर्मचारी यांची जुनी पेन्शन योजना बंद करून एनपीएस योजना केंद्र शासनाने लागू केली. देशातील काही राज्यांनी जुनी पेन्शन योजना लागू केली. त्याच धर्तीवर महाराष्ट्र शासनाने जुनी पेन्शन (Pension) योजना लागू करावी. तसेच राज्यात १ नोव्हेंबर २००५ पूर्वी नियुक्त परंतु १ नोव्हेंबर २००५ नंतर १०० टक्के अनुदानावर आलेल्या हजारो शिक्षकांची जुनी पेन्शन योजना शासनाने हिरावून घेतलेली आहे.

बरेचसे शिक्षक सेवानियुक्त झालेले आहे आणि ते वेठबिगारीचे जीवन जगत आहेत. सातत्याने या मागणी करीता आंदोलने करून अजूनही शिक्षक (Teacher) कर्मचारी यांना न्याय मिळालेला नाही त्यामुळे राज्यातील शिक्षक कर्मचाऱ्यांमध्ये तीव्र असंतोष निर्माण झालेला आहे. त्यामुळे क्लेशदायक पद्धतीने शिक्षकांनी स्वत: च्या रक्ताने लिहिलेले पत्र मुख्यमंत्री आणी पंतप्रधानांना पाठवलेले आहे.