संजय जाधव, साम टीव्ही

बुलढाणा: शिक्षक दिनाच्या दिवशीच शिक्षकांवरव मोर्चा काढण्याची वेळ आली असून शिक्षकांनी काळी फिती बांधून सरकारच्या धोरणाचा निषेध नोंदवला. महाराष्ट्र राज्य जुनी पेन्शन योजनेच्या प्रमुख मागणीसाठी बुलढाणा जिल्हाधिकारी कार्यालयावर मुकमोर्चा काढण्यात आला. जिल्हाभरातील शेकडो शिक्षक या मोर्चात सहभागी झाले होते.

राज्यात जवळपास 26 हजार शिक्षक जुन्या पेन्शनच्या प्रतीक्षेत आहेत. सरकारने या प्रश्नावर तातडीने निर्णय घ्यावा, अशी मागणी शिक्षकांनी केली आहे. मागणी मान्य न झाल्यास मुंबईतील आझाद मैदानावर आंदोलन छेडण्याचा इशारा शिक्षक संघटनेने दिला आहे.

या आंदोलनाची सुरुवात शिक्षकांनी 1 सप्टेंबरपासून हाताला काळ्या फिती बांधून केली आहे. 2005 पूर्वी नियुक्त झालेल्या अनेक शिक्षकांच्या शाळा नंतर 100 टक्के अनुदानावर आल्या. मात्र, सरकारने 2010 मध्ये काढलेल्या एका शासन निर्णयामुळे या शिक्षकांना जुन्या पेन्शन योजनेपासून वंचित राहावे लागले असल्याचा आरोप संघटनेने केला आहे.