मुंबई : मराठी भाषा शिकणार नाही, असं उद्दामपणे म्हणणाऱ्या उद्योगपती सुशील केडियाचं ऑफिस मनसे कार्यकर्त्यांनी फोडलं. मनसेने ऑफिस फोडल्यानंतर जाग आलेल्या सुशील केडियाने सोशल मीडियावर मनसे अध्यक्ष राज ठाकरे यांची माफी मागितली. ठाकरेंची माफी मागितल्यावर सुशील केडियाने सोशल मीडियावर आणखी एक पोस्ट केली आहे. या पोस्टमध्ये केडियाने थेट केंद्रीय गृहमंत्री अमित शहा यांना टॅग केलं आहे.

राज्यात मराठी भाषेवरून राजकीय वातावरण तापलं आहे. इयत्ता पहिलीपासून हिंदी भाषा लादण्याच्या विरोधात राज ठाकरे आणि उद्धव ठाकरे यांनी आक्रमक भूमिका घेतली आहे. काही दिवसांपूर्वी मिरा-भाईंदरमध्ये परप्रांतीय व्यापाऱ्यालाही मनसे कार्यकर्त्यांनी मारहाण केली होती.

या मारहाणीनंतर राजकीय वातावरण तापलं असताना उद्योगपती सुशील केडियाने राज ठाकरेंना डिवचलं होतं. '३० वर्षांपासून मुंबईत राहतोय. पण मला मराठी येत नाही. तुमच्या वाईट वागणुकीमुळे मराठी शिकणार नाही', असे केडियाने म्हटलं होतं. सुशील केडियाच्या पोस्टनंतर राजकीय वर्तुळ ढवळून निघालं. त्यानंतर आज केडियाने सोशल मीडियावर माफी मागितली आहे. मात्र, आज शनिवारी पुन्हा एकदा केंद्रीय गृहमंत्री अमित शहा यांना टॅग करत पोस्ट केली आहे.

सुशील केडियाने पोस्ट करत केंद्रीय गृहमंत्री अमित शहा यांची स्तुती केली. 'जर कोणाला शून्याला शून्याने कसं भागायचं माहीत असेल, तर त्याच्या कर्तृत्वाला मर्यादा उरत नाहीत. ते फक्त अमित शहा यांना जमू शकतं. त्यामुळे त्यांना आधुनिक चाणक्य म्हटलं जातं, असे सुशील केडियाने म्हटलं आहे.

कोण आहे सुशील केडिया?

सुशील केडिया हा उद्योजक आहे. त्याची केडिया नॉमिक नावाची कंपनी आहे. शेअर बाजारातील गुंतवणूकदार आणि शेअर बाजारातील नामांकित व्यावसायिक म्हणून त्याची ओळख आहे. केडिया हा गेल्या ३० वर्षांपासून मुंबईत व्यवसाय करत आहे.