अकोला: राज्यातील सत्तासंघर्षाबाबत आज सर्वोच्च न्यायालयात (Supreme Court) महत्वाची सुनावणी सुरु आहे. याच सुनावणी दरम्यान काँग्रेस प्रदेशाध्यक्ष नाना पटोले (Nana Patole) यांनी सूचक वक्तव्य केलं आहे.

न्यायालयाच्या निर्णयानंतर राज्यातील शिंदे-फडणवीस सरकार (Shinde-Fadnavis Government) कोसळलं तर राज्यात पुन्हा महाविकास आघाडीचं सरकार येऊ शकतं अशी शक्यता पटोले यांनी व्यक्त केली. ते अकोला जिल्ह्यातील अकोटमध्ये बोलत होते.

पटोले पुढे म्हणाले, महाराष्ट्रातील सरकारच मुळात असंवैधानिक असल्याचं सर्वोच्च न्यायालयातील सुनावणीत स्पष्ट होणार आहे. मुख्यमंत्र्यांविरोधातील सदस्यत्व अपात्रतेची याचिका प्रलंबित असताना त्यांचे मुख्यमंत्री म्हणून निर्णय वैध कसे असा सवालही यावेळी नाना पटोलेंनी केला.

पाहा व्हिडीओ -

शिवाय राहुल गांधींच्या (Rahul Gandhi) पदयात्रेमूळेच सरसंघचालकांना मस्जिदीला भेट घावी लागल्याचा टोला देखील पटोले यांनी यावेळी लगावला. तसंच दहशतवादी कायवायांना पाठिंबा देत घातपात करण्याच्या तयारीत असणाऱ्या 'पीएफआय' (PFI) संस्थेवरील बंदीसंदर्भात केंद्रानं लवकर निर्णय घ्यावा, अशी मागणीही नाना पटोलेंनी केली.