Sugar Cane Farmers Protest

अवकाळी पावसामुळे शेतकऱ्यांच नुकसान झालं म्हणत मगरीचे अश्रू ढाळत मोर्चे काढता आणि स्वतःवर ज्यावेळी वेळ येते त्यावेळी मात्र हात आखडता घेता, अशी बोचरी टीका स्वाभिमानी शेतकरी संघटनेचे नेते राजू शेट्टी यांनी जयंत पाटील यांच्यावर केली आहे. ऊस दरासंदर्भात बैठक फिस्कटल्यानंतर ते सांगलीतील इस्लामपूर येथे राजारामबापू साखर कारखाना येथे आंदोलन ठिकाणी बोलत होते.

दुपारपासून जयंत पाटलांच्या राजारामबापू साखर कारखान्याचे गाळप ठप्प झाले आहे. कारण ऊस दरासाठी स्वाभिमानी शेतकरी संघटनेचे नेते राजू शेट्टींच्या नेतृत्त्वात राजारामबापू साखर कारखान्यासमोर ठिय्या आंदोलन सुरू आहे. कारखानाच्या वजन काट्यासमोर ठिय्या आंदोलनामुळे उसाची वाहने थांबून आहेत. तर आंदोलकांनी या ठिकाणी जेवणाची सोय आणि मंडप ही घालण्यास सुरुवात केली आहे. कोल्हापूर जिल्ह्यातील साखर कारखान्यांनी जसा उसाचा फॉर्म्युला दिला आहे. तसाच सांगली जिल्ह्यातील कारखान्यांनी द्यावा या मागणीसाठी सकाळ पासून आंदोलन करण्यात येत आहे.

 ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

कारखाना प्रशासनासोबत स्वाभिमानीची बैठक फिस्कटली

राजारामबापू साखर कारखाना प्रशासनासोबत स्वाभिमानीची बैठक फिस्कटली.राजारामबापू साखर कारखान्याकडून 3100 रुपये पहिली उचल आणि गत हंगामातील 50 रुपये देण्याचा प्रस्ताव देण्यात आला. मात्र रिकव्हरी दराप्रमाणे पहिली उचल 3200 रुपये देण्याच्या मागणीवर राजू शेट्टी अडून बसले आहेत. आम्ही कारखानादारी विरोधात नाही मात्र दरासाठी आंदोलन सुरूच राहणार असल्याची भूमिका घेतली आहे.