भाजपचे आमदार तथा माजी मंत्री सुधीर मुनगंटीवार यांनी आज स्वतः पोलिस ठाण्यात जात प्रदूषण नियंत्रण विभागाचे प्रादेशिक अधिकारी तानाजी यादव यांच्याविरुद्ध तक्रार दाखल केली. ही तक्रार चंद्रपूर शहरातील रामनगर पोलीस ठाण्यात करण्यात आली असून यावेळी पीडित शेतकऱ्यांची मोठ्या संख्येने उपस्थिती होती. चंद्रपूर जिल्ह्यातील बेलसनी येथील महामाया इन्फ्रा डेव्हलपर्स प्रा. लि.च्या कोलवॉशरीमुळे निर्माण झालेल्या प्रदूषणामुळे परिसरातील शेतकऱ्यांच्या पिकांचे मोठे नुकसान झाल्याचा गंभीर आरोप होत आहे.

2024 पासून सुरू असलेल्या या प्रकल्पामुळे पर्यावरणीय प्रदूषण वाढून कापूस, सोयाबीनसह इतर पिकांचे मोठे नुकसान झाले आहे. जनावरांवर आणि नागरिकांच्या आरोग्यावरही परिणाम झाल्याचे तक्रारीत नमूद आहे. शासननियुक्त समितीने पंचनामा करून 68 लाख 61 हजार इतक्या नुकसानीची नोंद केली आहे. मात्र अद्यापही शेतकऱ्यांना नुकसानभरपाई मिळालेली नाही. या पार्श्वभूमीवर आमदार सुधीर मुनगंटीवार यांनी आज प्रदूषण नियंत्रण मंडळाचे अधिकारी तानाजी यादव यांच्यावर कर्तव्यात कसूर केल्याचा आरोप करत रामनगर पोलीस ठाण्यात तक्रार दाखल केली आहे.

यावेळी परिसरातील नुकसानग्रस्त शेतकरीही त्यांच्यासोबत उपस्थित होते. तसेच संबंधित अधिकाऱ्यावर फौजदारी गुन्हा दाखल करण्याची मागणीही करण्यात आली आहे. काही दिवसांपूर्वी पर्यावरण मंत्री पंकजा मुंडे यांनीही या कोल वॉशरीची पाहणी केली होती. त्यावेळी तिथे काळया धुळीचे साम्राज्य दिसून आले होते. त्यानंतर चारच दिवसांनी मुनगंटीवारांनी स्वतः तक्रार केल्याने हे प्रकरण अधिकच तापण्याची शक्यता आहे.