-- संदिप नागरे

हिंगोली : हिंगोलीच्या कळमनुरी तालुक्यातील वाकोडी या गावात पिसाळलेल्या कुत्र्याने अक्षरशः धुमाकूळ घालत पाच जणांना चावा घेऊन जखमी केल्याची धक्कादायक घटना घडली आहे. या पिसाळलेल्या कुत्र्याने तीन चिमुकल्या मुलांना व दोन प्रौढ नागरिकांना चावा घेतला आहे.

या पाच ही जखमींवर हिंगोलीच्या जिल्हा सामान्य रुग्णालयात उपचार सुरू आहेत. गेल्या अनेक दिवसांपासून या गावात एका गृहस्थाकडे पाळीव असणारा कुत्रा पिसाळला होता. त्याचा बंदोबस्त करण्याची मागणी गावकऱ्यांनी ग्रामपंचायत कार्यालयाकडे केली होती.

मात्र, पाच जणांना चावा घेऊन देखील कोणीच या गंभीर घटनेची दखल घेतली नसल्याचे गावकऱ्यांचे म्हणणे आहे. गावातील ग्रामसेवक व सरपंच यांनी या पिसाळलेल्या कुत्र्याकडे दुर्लक्ष केल्यामुळेच अश्या घटना घडल्याचा आरोप गावकऱ्यांनी केला आहे.

Edited By : Krushnarav Sathe