कराड : मागील अनेक दिवसांपासून राज्यसभेच्या सहाव्या जागेवरुन राज्यभरातील राजकारण तापलं आहे. आता राज्यसभेच्या या जागेबाबत काँग्रेसचे जेष्ठ नेते तथा माजी मुख्यमंत्री पृथ्वीराज चव्हाण (Prithviraj Chavan) यांनी राज्यसभेची सहावी जागा हा महाविकास आघाडीचा विषय नसल्याचं वक्तव्य केलं आहे.

राज्यात राज्यसभेच्या (Rajya Election 2022) सहाव्या जागेवरून राजकारण चांगलंच तापलं होतं. या जागेसाठी संभाजीराजे छत्रपती (Sambhajiraje Chhatrapati) अपक्ष म्हणून रिंगणात उतरले होते. मात्र त्यांना भाजप आणि महाविकासआघाडी यांच्यापैकी कोणीही पाठिंबा दिला नाही. तसंच मुख्यमंत्र्यांनी आपल्याला दिलेला शब्द पाळला नसल्याचं वक्तव्य संभाजाराजे यांनी आज केलं आहे.

हे देखील पाहा -

याच पार्श्वभूमीवर राज्याचे माजी मुख्यमंत्री पृथ्वीराज चव्हाण यांना प्रश्न विचारला असता ते म्हणाले, 'राज्यसभेची सहावी जागा हा महाविकास आघाडीचा विषय नाही. काँग्रेसची एक जागा, शिवसेनेच्या दोन जागा आणि राष्ट्रवादीची एक जागा आहे. प्रत्येक पक्षाने ठरवायचं की उमेदवार कोण द्यायचा' असं ते म्हणाले आहेत. तसंच जर भाजपने संभाजीराजेंना उमेदवारी दिली तर, भाजप नेते सुधीर मुनगंटीवार यांच हार घालून स्वागत करेन, असा टोलाही त्यांनी यावेळी लगावला. भाजपनेते सुधीर मुनगंटीवार यांनी गादीचा मान वेगळा आणि तिकीट वेगळं असल्याचं वक्तव्य केलं होतं यावर चव्हाण यांनी प्रतिक्रिया दिली आहे.

Edited By - Jagdish Patil