संजय महाजन, जळगाव प्रतिनिधी

Kannad Ghat ST Bus Accident : छत्रपती संभाजीनगरहून सुरतकडे जाणाऱ्या एसटी बसचा कन्नड घाटात स्टेअरिंग रॉड जॅम होऊन तुटल्याने बसचे नियंत्रण सुटल्याची थरारक घटना आज सकाळी घडली. सुदैवाने, नियंत्रण सुटलेली बस घाटातील सरंक्षक कठड्याला अडकून थांबल्यामुळे मोठा अपघात टळला. या बसमध्ये तब्बल ५९ प्रवासी होते. या भीषण प्रसंगातून सर्व प्रवाशांचा जीव वाचला असून ४ प्रवासी किरकोळ जखमी झाले आहेत.

घाटातील भीषण दुर्घटनेतून प्रवासी सुरक्षितपणे बचावल्याने सर्वांनी सुटकेचा निःश्वास सोडला आहे. घटनेत किरकोळ जखमी झालेल्या चार प्रवाशांना तातडीने उपचारासाठी जवळच्या रुग्णालयात दाखल करण्यात आले असून, उर्वरित सर्व प्रवासी सुरक्षित आहेत.

घटनेची माहिती मिळताच पोलिसांनी तातडीने घटनास्थळी धाव घेतली. पोलिसांनी स्थानिक नागरिकांच्या मदतीने बचावकार्य सुरू करून सर्व प्रवाशांना सुरक्षितपणे बसबाहेर काढले.

दरम्यान, कन्नड घाटातील या घटनेमुळे एसटी महामंडळाच्या बस देखभाल आणि दुरुस्तीचा प्रश्न पुन्हा एकदा ऐरणीवर आला आहे.

बसचा स्टेअरिंग रॉड जॅम होऊन कसा तुटला? या प्रवासापूर्वी बसची योग्य तांत्रिक तपासणी झाली होती का? असे अनेक गंभीर प्रश्न आता उपस्थित होत आहेत. सुदैवाने या वेळी कोणतीही जीवितहानी झाली नसली, तरी प्रशासनाने अशा तांत्रिक त्रुटींकडे वेळीच गांभीर्याने लक्ष देणे गरजेचे आहे.