Solapur News : सोलापूरमधून एक धक्कादायक माहिती समोर आली आहे. सोलापूरच्या मोहोळमधील एका शाळेतील अंगणवाडी सेविकेचा हृदयविकाराने मृत्यू झाला आहे. हृदयविकाराचा झटका आल्यानंतर तिला रुग्णालयात नेण्यात आले होते. रुग्णालयात दाखल केल्यानंतर डॉक्टरांनी तिला मृत घोषित केले. ही घटना औंढी ताल, मोहोळ येथे घडली आहे.

मृत अंगणवाडी सेविकेचे नाव अंजली सागर घोडके (वयवर्ष २४) आहे अशी माहिती पोलिसांनी दिली आहे. पोलिसांकडून मिळालेल्या माहितीनुसार, ती औंढी परिसरातील शिंदे वस्ती शाळेत अंगणवाडी सेविका म्हणून काम करत होती. आज (२३ जानेवारी) तिला दुपारी एकच्या सुमारास चक्कर आली. त्याच अवस्थेत तिला मोहोळ येथील खासगी रुग्णालयात उपचारांसाठी नेण्यात आले. दरम्यान उपचार सुरु करण्यापूर्वीच डॉक्टरांनी तिला मृत घोषित केले.

या घटनेमुळे औंढी परिसरात हळहळ व्यक्त केली जात आहे. दरम्यान या प्रकरणाचा तपास मोहोळ पोलीस करत आहेत. चौवीसाव्या वर्षी हृदयविकाराचा झटका येऊन मृत्यू झाल्याच्या घटनेने तेथील लोकांनी धसका घेतला आहे. या घटनेमुळे दिवसेंदिवस हृदयविकाराचा झटका येण्याचे प्रमाण वाढल्याचे लक्षात येते. काही दिवसांपूर्वी ८ वर्षीय मुलीचा हृदयविकाराचा झटका आल्याने मृत्यू झाला होता.