सोलापूर : सोलापूर जिल्ह्यातील करमाळा तालुक्यातील कोर्टी येथे एक धक्कादायक घटना घडली आहे. पत्नीचा गळा दाबून हत्या करून पतीने स्वतःही गळफास घेऊन आत्महत्या केल्याची धक्कादायक घटना घडली आहे. युवराज लक्ष्मण शेरे (वय ३१) आणि रूपाली युवराज शेरे (वय २५) असं मृत पती-पत्नीचं नाव आहे. गेल्या काही दिवसांपासून युवराज सतत पत्नीवर चिडचिड करत होता, कुटुंबियांशी देखील तो मागील दोन महिन्यापासून व्यवस्थित बोलत नव्हता. त्याला कोणता तरी त्रास होता, ज्याच्यातून टोकाचं पाऊल उचलत त्याने आपल्या साडेचार महिन्याच्या चिमुकलीसमोरच पत्नीचा गळा दाबून हत्या केली. त्यानंतर स्वतःलाही संपवलं आहे. या घटनेनं परिसरात खळबळ उडाली आहे.

युवराज शेरे हा पत्नी, आई, वडील, भाऊ, भावजय लहान मुलीसह कोर्टी येथील हुलगेवाडी रस्त्यावरील शेरेवस्ती येथे राहत होता. युवराज शेरे आणि त्याची पत्नी रूपाली दोघेच घरी होते. घरात कोणीही नसल्याने युवराजने पत्नी रूपालीची गळा दाबून हत्या केली. त्यानंतर आपल्या हातून होत्याचं नव्हतं झाल्याच्या पश्चातापातून युवराजने देखील स्वतः घरातील अँगलला गळफास घेऊन आत्महत्या केली असावी, असा पोलिसांचा अंदाज आहे.

त्याच दिवशी सायंकाळी साडेपाच सहाच्या सुमारास कामानिमित्त बाहेर गेलेले कुटुंबातील इतर लोक घरी आले. त्यावेळी चिमुकली बंद घरात रडत होती. त्यावेळी युवराजच्या वडिलांनी दरवाजा तोडून आता प्रवेश केला. तेव्हा सून रूपाली निपचित पडली होती आणि युवराज लोखंडी अँगलला लटकत असल्याचं दिसले. त्यांनी युवराजला खाली उतरवलं आणि पोलिसांना कळविलं. यानंतर पोलीस घटनास्थळी दाखल झाले, पोलिसांनी मृतदेह उत्तरीय तपासणीसाठी सरकारी दवाखान्यात पाठविले आहेत. पोलीस निरीक्षक विनोद घुगे याबाबतचा अधिक तपास करत आहेत.

युवराज शेरे हा काही दिवसांपासून तणावाखाली होता. त्यातूनच युवराज याने पत्नी रूपालीची गळा दाबून हत्या केली. त्यानंतर युवराज यानेही आत्महत्या केली आहे. या घटनेनं करमाळा हादरून गेलं आहे. पती-पत्नीच्या मृत्यूनंतर साडेचार वर्षांची चिमकुली मात्र पोरकी झाली आहे. या घटनेची करमाळा पोलीस ठाण्यात नोंद करण्यात आली आहे.