सोलापूर : बार्शी पंचायत समितीचे माजी सभापतींजवळ उत्पन्नापेक्षा जास्तीची बेहिशेबी मालमत्ता आढळून आली आहे. यामुळे त्यांच्या अडचणीत वाढ झाली असून माजी सभापती अनिल डिसले यांच्याविरोधात अँटीकरप्शनने कारवाई केली आहे. याशिवाय पत्नी व मुलाविरोधात देखील गुन्हा दाखल करण्यात आला आहे. 

सोलापूर (Solapur News) जिल्ह्यातील बार्शी पंचायत समितीचे माजी सभापती अनिल डिसले यांच्याविरोधात अँटीकरप्शनने कारवाई केली आहे. त्यांच्यावर बेहिशोबी मालमत्ता आढळून आल्याने त्यांच्या अडचणीत वाढ झाली आहे. अनिल डिसले यांनी तत्कालीन पंचायत समिती सभापती असताना भ्रष्ट आणि गैरमार्गाने उत्पन्नापेक्षा जास्त मालमत्ता जमवल्याचा आरोप होता. त्यानुसार सोलापूर (Barshi) अँटी करप्शन पथकाने अनिल डिसले यांची चौकशी केल्यानंतरसदरची कारवाई करण्यात आली आहे. 

पत्नी व मुलांच्या नावाने ९ कोटींच्यावर मालमत्ता 

अनिल डिसले यांच्यासह पत्नी आणि दोन मुलांविरोधात कमाईपेक्षा जास्त मालमत्ता आढळल्याने बार्शी शहर पोलीस ठाण्यात गुन्हा दाखल करण्यात आला आहे. अनिल डिसले यांच्यासह पत्नी आणि दोन मुलांच्या नावावर नऊ कोटी ६९ लाख रुपयांची अपसंपदा जमावल्याचे आढळून आली आहे. यामुळे अनिल डिसले यांच्यासह पत्नी संगीता डिसले, मुलगा स्वप्निल आणि सागर डिसले यांच्या विरोधात बार्शी शहर पोलीस ठाण्यात गुन्हा दाखल करण्यात आला.