भंडाऱ्यातून धक्कादायक बातमी समोर आली आहे. भंडाऱ्याच्या मोहाडी गावात १६ वर्षीय मुलीवर अत्याचार करण्यात आले आहे. धक्कादायक म्हणजे पीडितेच्या मैत्रिणीनेच तिच्या लैंगिक अत्याचाराचा कट रचल्याचे पोलीस तपासादरम्यान उघडकीस आले आहे. ही घटना २६ जून रोजी घडली असून पोलिसांनी या प्रकरणी पीडितेच्या मैत्रिणींसह तिघांना अटक केली आहे.

भंडाऱ्याच्या मोहाडी गावात एक तरुणी तिच्या मैत्रिणीला घेऊन २६ जून रोजी बॉयफ्रेंडच्या घरी गेली होती. यावेळी तरुणीच्या बॉयफ्रेंडच्या घरी तिच्या बॉयफ्रेंडसह अन्य दोघे मित्रही आधीच उपस्थित होते. यावेळी तरुणीने आणि अन्य दोघांनी त्यातील एकाला तरुणीच्या मैत्रिणीसोबत बळजबरीनं शारीरिक संबंध प्रस्थापित करायला लावले.

घाबरलेल्या पीडितेने घटनास्थळावरुन पळ काढत घर गाठले. घडलेली आपबिती कुटुंबाला सांगितली मात्र, समाजात बदनामी आणि घडलेल्या प्रसंगानं पीडिता दहशतीत होती. पीडीतेचा भाऊ बाहेरगावरून आल्यानंतर त्यानं बहिणीला विश्वासात घेत मोहाडी पोलिसात आरोपींविरुद्ध तक्रार दाखल केली. आरोपी तरुणी, प्रणय पाटील (२३), निकुंज मेहर (२४) आणि बाल्या बोंद्रे (४५) अशा चौघांच्या विरुद्ध पोलीस ठाण्यात गुन्हे दाखल केले आहे.

दाखल केलेल्या तक्रारीवरून कलम ६४(२)(i)७०(२) बाल लैंगिक अत्याचार अन्वये ४,६,८ पॉक्सो अंतर्गत गुन्हा दाखल करण्यात आला आहे. यातील काही आरोपींना मोहाडी पोलिसांनी अटक केली असून अन्य आरोपींचा शोध सुरू आहे.