शुभम देशमुख, भंडारा

माणुसकीला काळिमा फासणारी एक संतापजनक घटना समोर आली आहे. तुमसर तालुक्यातील राजापूर-नाकाडोंगरी मार्गावर मंदिर परिसरातील दुर्गा देवीच्या मूर्तीजवळ पहाटे एक नवजात बालक मृतावस्थेत आढळल्याने संपूर्ण परिसरात खळबळ उडाली आहे. या घटनेचा पोलीस सविस्तर तपास करत आहेत.

राजापूर-नाकाडोंगरी मार्गावर शिवमंदिर असून या परिसरात दररोज नागरिक सकाळी फिरायला जातात. आज नेहमीप्रमाणे काही नागरिक पहाटेच्या सुमारास फिरण्यासाठी गेले असता, त्यांना मंदिरातील दुर्गा देवीच्या मूर्तीजवळ एक कापडात गुंडाळलेले छोटे बाळ दिसून आले.

जवळ जाऊन पाहिले असता ते अर्भक हालचाल करत नव्हते. नागरिकांनी तातडीने याची माहिती आजूबाजूच्या लोकांना आणि गोबरवाही पोलीस स्टेशनला दिली.घटनेची माहिती मिळताच गोबरवाही पोलिसांनी तात्काळ घटनास्थळ गाठले. पोलिसांनी घटनास्थळाचा पंचनामा करून अर्भकाचा मृतदेह ताब्यात घेतला असून तो उत्तरीय तपासणीसाठी रुग्णालयात पाठवण्यात आला आहे.

अर्भक रात्रीच्या अंधारात मंदिरात कोणी आणून सोडले? आणि बालकाचा मृत्यू थंडीमुळे झाला की त्याला मृतावस्थेतच तिथे टाकण्यात आले, याबाबत पोलीस कसून तपास करत आहेत. या घटनेमुळे परिसरात हळहळ व्यक्त केली जात असून, अशा प्रकारे पोटच्या गोळ्याला वाऱ्यावर सोडणाऱ्या निर्दयी व्यक्तीचा शोध घेण्याचे आव्हान पोलिसांसमोर आहे.