सिंधुदुर्गातून मानव जातीला काळिमा फासणारी धक्कदायक घटना समोर आली आहे. सावंतवाडी तालुक्यात गेल्या दीड महिन्यांपासून वावरत असलेल्या ओंकार नावाच्या हत्तीला नदीपात्रात डुंबत असताना सुतळी बॉम्ब फेकून देण्याचा अमानवी आणि भयंकर प्रकार समोर आला आहे. या घटनेचे व्हिडिओ देखील उघडकीस आला आहे.

मिळलेल्या माहितीनुसार, तुळसाण येथे नदीत ओंकार हत्ती शांतपणे पाण्यात आंघोळ करत असताना काही व्यक्तींनी त्याच्या शेजारीच पाण्यात चक्क बॉम्ब फेकले. त्या आवाजाने आणि फटाक्याने ओंकार हत्ती घाबरला. व्हिडिओ मध्ये चित्रित झाल्याप्रमाणे फटाक्यांच्या तीव्र आवाजाला घाबरून हत्तीने काठापासून पाण्याच्या आतल्या बाजूला पळ काढला. या घटनेचा व्हिडिओ सोशल मीडियावर मोठ्या प्रमाणावर व्हायरल होत आहे.

सावंतवाडी तालुक्यातील काही गावांमध्ये गेला महिनाभर धुमाकूळ घालणाऱ्या 'ओंकार' हत्तीला दांड्याने मारहाण करून पिटाळून लावतानाच एक व्हिडिओ सध्या व्हायरल होत आहे. हा किळसवाणा प्रकार समोर आल्यानंतर जनतेतून वन विभाग आणि संबंधित कर्मचाऱ्यांवर तीव्र संताप व्यक्त होत आहे.

विशेष म्हणजे दांड्याने मारहाण होत असताना वनविभागाचे कर्मचारी उपस्थित होते. त्यांच्या डोळ्या देखत हा प्रकार सुरु होता त्यामुळे हत्तीला दांड्याने मारहाण करणाऱ्या व तेथे उपस्थित असलेल्या वन कर्मचाऱ्यांवर कारवाई करण्याची मागणी होत आहे. या कृत्यांमुळे प्राणीमित्रांमध्ये तीव्र नाराजी पसरली आहे. बॉम्ब फेकून जखमी झाल्यास त्याला जबाबदार कोण? असा संतप्त सवाल आता प्राणी प्रेमींकडून उपस्थित केला जात आहे.