पुणे : आरोग्य विभागाच्या भरती परीक्षेत सुरुवातीपासूनच प्रचंड गदारोळ झाल्याचे आपण पहिले आहे. या परीक्षेसाठी विद्यार्थ्यांनी प्रचंड मनःस्ताप सहन केला आहे. अचानकपणे रद्द झालेली परीक्षा, ज्या कंपनीच्या माध्यमातून हि भरती परीक्षा घेण्यात आली त्या न्यासा या संस्थेबाबत निर्माण झालेले प्रश्नचिन्ह आदी सर्व बाबी नजरेआड करून अखेर परीक्षा संपन्न झाली. मात्र, या परीक्षेचा पेपर परीक्षेपूर्वीच फुटल्याची माहिती विद्यार्थ्यांनी समोर आणली आणि या गैरप्रकाराची व्याप्ती अजूनही वाढताना दिसत आहे.

आरोग्य विभागाच्या नोकर भरती 'गट ड' चा पेपर सरकारी अधिकाऱ्यांनीच फोडला असल्याची धक्कादायक माहिती समोर आली होती. आरोग्य भरतीचा पेपर परीक्षेआधीच आरोपींनी १५ लाख रुपयांना विकला होता. साम टीव्हीने या प्रकरणाचा सातत्याने पाठपुरावा केला होता. या प्रकरणात आरोपींविरोधात पुणे सायबर पोलिसांनी गुन्हे देखील दाखल केले आहेत.

यामध्ये आरोग्य विभागाच्या मुख्याधिकाऱ्यासह ५ अधिकाऱ्यांना अटक करण्यात आली असून, 'गट ड' बरोबरच आरोग्य विभागाच्या 'गट क' पेपरफुटीचे पुरावे आता सापडल्याची माहिती समोर येत आहे. आरोपींच्या मोबाईल मध्ये 'गट क' साठी कोणाला नोकरी लावायची यासंदर्भातली यादीच सापडली आहे.

लातूरच्या आरोग्य विभागातील मुख्याधिकारी प्रशांत बडगीरे, बीडच्या मेंटल हॉस्पिटलचा वैद्यकीय अधिकारी संदीप जोगदंड, उस्मानाबाद आरोग्य विभागातील क्लर्क राजेंद्र सानप व श्याम मस्के या आरोपींनी हा पेपर फोडल्याचे तपासात समोर आले आहे. या प्रकरणात आतापर्यंत एकूण ११ आरोपींना अटक करण्यात आली आहे.

या सर्व गैरप्रकारावर राज्यभरातील आरोग्य विभागाच्या परीक्षा दिलेल्या विद्यार्थ्यांनी तीव्र संताप व्यक्त केला असून आरोग्यमंत्री राजेश टोपे यांना पेपरफुटी प्रकरणात आणखी काय पुरावे हवे आहेत? जेणेकरून या आरोपींविरुद्ध कडक कारवाई करण्यात येईल व सध्याचा पेपर रद्द करून परीक्षा पुन्हा घेण्यात येतील असा संतप्त सवाल विद्यार्थी व्यक्त करत आहेत.

Edited By : Krushnarav Sathe