नागपूर : बदलत्या काळाच्या ओघात देश प्रगतीपथावर असल्याचं सांगितलं जातं. यावर्षी देशाचा ७५ वा अमृत महोत्सवही साजरा केला जात आहे. मात्र, असं असलं तरी, आपली दुसरी बाजूही निखरणे तितकंच महत्वाचं आहे. विदर्भातील नागपूर जिल्ह्यातून गेल्या सात महिन्यांत तब्बल ९५८ महिला तसेच मुली बेपत्ता झाल्या असल्याची धक्कादायक माहिती समोर आली आहे. नागपूर पोलिसांनी ही माहिती दिली आहे. (Nagpur Crime News)

धक्कादायक बाब म्हणजे मुली आणि महिला बेपत्ता होण्याची वेगवेगळी कारणं समोर आली आहे. नागपूर पोलिसांकडून मिळालेल्या माहितीनुसार,जानेवारी ते जुलै महिन्यात नागपूरातील विविध पोलीस स्टेशनमध्ये महिला बेपत्ता असल्याच्या तक्रारी प्राप्त झाल्या आहेत.

बेपत्ता झालेल्या महिलांमध्ये २१ वर्षाखालील मुलींचे प्रमाण सर्वाधिक आहे. गेल्या सात महिन्याच्या कालावधीत तब्बल ३१२ तरुणी बेपत्ता झाल्याची तक्रार पोलिसांत दाखल झाली आहे. यामध्ये रागाच्या भरात घरातून निघून जाणाऱ्या तरुणींचं प्रमाण सर्वाधिक आहे. (Nagpur Todays News)

पतीसोबत भांडणातून महिलांनी सोडलं घर

संसाराचा गाडा हाकत असताना, भांड्याला भांडे हे लागणारच. अगदी छोट्या मोठ्या कारणाने दिवसेंदिवस पती-पत्नीमधील वाद विकोपाला पोहचत आहे. कारण क्षुल्लक पण निर्णय मोठा घेऊन संसार मोडल्याच्या अनेक घटना घडत आहे. त्यामुळे नवऱ्याच्या त्रासाला कंटाळून किंवा सतत होणाऱ्या वादाला वैतागूनही महिलांनी घर सोडल्याचे प्रकार घडलेले आहेत. यानंतर समुपदेशन आणि सल्ल्याने पुन्हा संसार हे जुळलेले देखील आहेत.

प्रेमप्रकरणातून ठोकली धूम

आधुनिक तंत्रज्ञानाचा जगात समाजव्यवस्थेतही मोठे बदल पाहयला मिळत आहे. चूल आणि मूल ही गोष्ट बाजूला सावरून मुलींचा शिक्षणात तसेच नोकरीत अग्रेसर आहे. त्यामुळे प्रेम प्रकरणेही वाढली आहे. तरुण-तरुणींच्या प्रेमात जर कुटुंबियांचा अडसर होत असेल तर थेट पळून जाण्याचा मार्ग स्विकारला जात आहे. त्यामुळेच महिलांपाठोपाठ तरुण मुलीदेखील घर सोडून जात आहेत. गेल्या काही वर्षांमध्ये याचे प्रमाण वाढत असल्याचे सांगितले जात आहे.

Edited By - Satish Daud