राज्य महामंडळाची सर्वात महत्त्वाची मानली जाणारी इयत्ता १०वी आणि १२ वीची परीक्षा काही दिवसांवर येऊन ठेपली आहे. विद्यार्थ्यांची परीक्षेची तयारी जोमाने सुरु असून परीक्षेसाठी सज्ज होत आहेत. अशातच नागपुरमधून धक्कादायक बातमी समोर आली आहे. अभ्यासाच्या तणावातून एका दहावीच्या विद्यार्थिनीने आत्महत्या केली आहे. मृत मुलीचे नाव रुद्राईंनी दीपक शेलकरी असे आहे. या घटनेनंतर नागपूरमध्ये एकच खळबळ उडाली असून मुलीच्या कुटुंबावर दुःखाचा डोंगर कोसळला आहे.

मिळलेल्या माहितीनुसार, मृत अल्पवयीन विद्यार्थिनी रुद्राईंनी दीपक शेलकरी (वय १६) ही नागपूरमधील विवेकानंद नगरमध्ये राहायची. ती नागपूर मधील वडधामना येथील कारमेल अकॅडमी शाळेतील इयत्ता १०वीच्या वर्गात शिकत होती. काल दुपारी घरी कोणी नसल्याची संधी साधून तिने गळफास घेत आयुष्याचा शेवट केला. हा प्रकार तिच्या लहान भावाच्या लक्षात येताच त्याने कुटुंबाला याबाबत कळवलं. घटनेची माहिती मिळताच कुटुंबीय आणि शेजाऱ्यांनी घटनास्थळी धाव घेतली.

घटक चाचणी आणि बोर्ड परीक्षेतील गुणांबाबत तणाव असल्याच्या कारणावरून या मुलीने आत्महत्या केली असल्याची प्राथमिक अंदाज आहे. आत्महत्येचे नेमके कारण अद्याप स्पष्ट नसून यापूर्वी देखील याच शाळेतील एका विद्यार्थिनीने आत्महत्या केली असल्याची चर्चा आहे.

दरम्यान मृत मुलीवर शनिवारी दवलामेटी म्हाडा कॉलनीतील स्मशानभूमीत अंत्यसंस्कार करण्यात आले. शिवाय वाडी पोलीस ठाण्यात आकस्मिक मृत्यूची नोंद करण्यात आली असून या आत्महत्येमागील ठोस कारण शोधण्यासाठी पोलीस पुढील सखोल तपास करत आहेत. विद्यार्थिनीच्या आत्महत्येनंतर कुटुंबियांवर दुःखाचा डोंगर कोसळला असून परिसरात भीतीचे वातावरण निर्माण झाले आहे. या घटनेनंतर मानसिक आरोग्य व विद्यार्थ्यांवरील शैक्षणिक दबावाचा मुद्दा पुन्हा ऐरणीवर आला आहे.