शिर्डी: साई बाबांच्या साईसंस्थानचे प्रशासकीय अधिकारी राजेंद्र जगताप व अन्य पाच जणांना पोलीसांनी अटक केली आहे. साई संस्थानचा कारभार पहाणाऱ्या तदर्थ समितीचे अध्यक्ष व जिल्हा प्रधान न्यायधिश हे एका सदस्यांसह काही दिवसांपूर्वी साईमंदिराची पहाणी करीत असल्याचे सीसीटीव्ही फुटेज सोशल मिडीयावर व्हायरल केल्याने हि कारवाई करण्यात आली आहे. साईमंदिर सुरक्षाप्रमुख हर्षवर्धन गवळी यांनी चौकशी करून अहवाल सादर केला. त्यानुसार प्रशासकीय अधिकारी राजेंद्र जगताप, सीसीटीव्ही विभागप्रमुख विनोद कोते, राहूल फुंदे, अजित जगताप, व चेतक साबळे यांच्यावर हि कारवाई करण्यात आली.

सुरक्षेच्या कारणास्तव साईमंदिरातील सीसीटीव्ही फुटेज बाहेर द्यायला परवानगी नाही. साईसंस्थानने तसा ठराव केला आहे, साईमंदिर सध्या दर्शनासाठी बंद आहे. मग हे फोटो व फुटेज व्हायरल केले कुणी, यामागे न्यायधिशांची रेकी करण्याचा हेतू तर नव्हता, बदनामी करण्याचा हेतू तर नव्हता. साईमंदिर सुरक्षा व्यवस्थेशी हि बाब निगडीत आहे, त्यामुळे याप्रकरणाची चौकशी व्हावी. अशी तक्रार माहीतीच्या अधिकारातील कार्यकर्ते संजय काळे यांनी तदर्थ समितीच्या अध्यक्षांकडे केल्याने पोलीस निरीक्षक गवळी यांनी चौकशी करून अहवाल तयार केला. त्यानुसार हि कारवाई करण्यात आली आहे.

Edited By: Pravin Dhamale