महाराष्ट्राच्या राजकारणात कधी काय घडेल याचा नेम नाही. विधानभवनाच्या दालनात झालेल्या एका भेटीनं मविआतलं अंतर्गत राजकारण चांगलंच तापलंय. शरद पवारांची राष्ट्रवादी एनडीएसोबत जाणार असल्याची चर्चा असतानाच खुद्द शरद पवारांनीच राज्याचे उपमुख्यमंत्री एकनाथ शिंदे यांची विधानभवनात भेट घेतली... विशेष म्हणजे शरद पवारांनी शिंदेंच्याच दालनात पक्षाच्या आमदारांची बैठकही घेतली... त्यामुळे शिंदेंसोबतच्या भेटीनंतर मविआत वादाची ठिणगी पडलीय...गद्दारांना प्रतिष्ठा दिल्यानं ठाकरेसेना दुखावलीय. आणि ठाकरेसेनेनं जाहीरपणे ही नाराजी व्यक्त केलीय. मात्र यावर पवारांच्या राष्ट्रवादीनं तीव्र आक्षेप घेतलाय.

ठाकरेसेनेनं केवळ भेटीवर नाराजी व्यक्त न करता थेट पवारांच्या राष्ट्रवादीच्या विश्वासार्हतेवरच प्रश्नचिन्ह उपस्थित केलंय. मात्र ठाकरेसेनेची ही भूमिका काँग्रेसला मान्य नाही. काँग्रेसनं या भेटीचं जाहीर समर्थन केलंय.

पवारांच्या विश्वासार्हेतेवर ठाकरेसेनेचं प्रश्नचिन्ह

दुसरीकडे येत्या काही दिवसात एनडीएची ताकद वाढताना दिसेल”, असे सूचक वक्तव्य शिंदेसेनेचे मंत्री योगेश कदमांनी केलयं...

शरद पवारांची भूमिका अनेकदा महाराष्ट्राच्या राजकारणात संभ्रम निर्माण करणारी असल्याची चर्चा नेहमीच चर्चा रंगत असते. 2019 ला उद्धव ठाकरेंच्या नेतृत्वात महाविकास आघाडीचा अनपेक्षित प्रयोगही शरद पवारांनीच घडवून आणला होता. त्यामुळे असंच काही वेगळ राजकीय समीकरण नजीकच्या काळात पाहायला तर मिळणार नाही ना? अशी उत्सुकता महाराष्ट्रातल्या जनतेच्या मनात निर्माण झालीय़.