Ganpatipule News : राज्यभरात गणेशाेत्सव माेठ्या उत्साहात साजरा केला जात आहे. गणेश चतुर्थी निमित्त आज रत्नागिरी (ratnagiri) जिल्ह्यातील गणपतीपुळे (ganpatipule) येथे गणेश मंदिरात राज्यभरातील गणेशभक्त आले आहेत. दरम्यान आज दुपारच्या सुमारास एका पर्यटकास समुद्रातून बूडताना वाचविण्यात यश आलं आहे.

रत्नागिरीच्या गणपतीपुळे मंदिरात देशाच्या कानाकोप-यातून गणपतीचे दर्शन घेण्यासाठी भाविक आले आहेत. आज पहाटेपासून या ठिकाणी पूजा अर्चा सुरु आहे. गणेश चतुर्थी असल्याने श्रीक्षेत्र गणपतीपुळेत गणेश भक्तांची आज खूप माेठी गर्दी झाली आहे. प्रत्येक भाविकास दर्शन मिळेल अशी शिस्तबद्ध व्यवस्था मंदिरात करण्यात आली आहे.

दरम्यान गणपतीपुळे येथील समुद्रात आज एका बुडणा-या पर्यटकाला वाचवण्यात यश आलं आहे. गुलशन राठोड असं पर्यटकाचे नाव आहे. ताे नांदेडमधील रहिवासी आहे. गुलशन बुडत असताना लाेकांनी मदतीसाठी हाक दिली. त्याचवेळी शरद मयेकर यांनी जीवाची पर्वा न करता खाेल समुद्रात जाऊन गुलशनला वाचवले.

दरम्यान गणपतीपुळेत पर्यटकांची मोठी गर्दी आहे. त्यामुळे येथे जीव रक्षक असणे गरजेचे आहे असं काही पर्यटकांनी साम टीव्हीशी बाेलताना सांगितलं.

Edited By : Siddharth Latkar