फैय्याज शेख 
शहापूर : लहान मुलांना कामाला लावणे कायद्याने मनाई आहे. अशा पद्धतीने मजुरीसाठी कामाला लावणे गुन्हा असताना देखील परराज्यातून अल्पवयीन मुलांना आणून त्यांना मुंबई- नाशिक महामार्गावर कामासाठी मजूर म्हणून लावण्यात आल्याचा प्रकार समोर आला आहे. या प्रकरणी सिगल कंपनीच्या मॅनेजर व मॅनेजमेंटवर गुन्हा दाखल करण्याची कारवाई करण्यात आली आहे. 

महामार्ग किंवा रस्त्याचे काम करण्यासाठी बाहेरून मजूर आणले जात असतात. यासाठी परराज्यातील परिवार स्थायिक होत असतात. त्यानुसार मुंबई- नाशिक महामार्गावर शहापूर तालुक्यातील कसारा बायपास येथे एका अंडरपास पुलाचे काम सुरू आहे. तसेच पुलावर सिमेंट काँक्रीटच्या भेगांमध्ये गरम डांबर भरण्याचे काम सुरू असून यासाठी मजुरांची आवश्यकता असल्याने सदर कामासाठी बाहेरून मजूर आणले जात आहेत. 

लहान मुलांचा जुंपले मजुरीच्या कामाला 

बोगद्याचे काम सुरु असताना यासाठी काही मजूर काम करत आहेत. तर भर उन्हात गरम डांबर भरण्यासाठी कामगार म्हणून १४ व १५ वर्षाचे लहान परराज्यातील मुलांचा मजूर म्हणून सर्रास वापर केला जात आहे. ही बाब कसारा येथील उद्धव ठाकरे गटाच्या शिवसैनिकांच्या लक्षात आल्यावर त्यांनी तत्काळ पोलिसांना याची माहिती देत घटनास्थळी बोलावले. 

कंपनी मॅनेजमेंटवर गुन्हा दाखल 

यानंतर पोलिस सदर कामाच्या ठिकाणी येऊन चौकशी केली. तसेच काम करणाऱ्या या कामगारांचे आधार कार्ड तपासले असता यांचे वय हे कोणाचे १४ वर्षे तर कोणाचे १५ वर्षे आढळून आले. यामुळे कसारा पोलीस ठाण्यात सिगल कंपनीचे मेनेजर व कंपनी मॅनेजमेंट यांच्या विरोधात बालमजूर कायद्याअंतर्गत गुन्हा दाखल करण्यात आला आहे. तर पुढील तपास कसारा पोलीस करत आहे.