भंडारा : लग्नाचे आमिष दाखवत अल्पवयीन बालिकेवर बलात्कार (Rape) केल्याची धक्कादायक घटना समोर आली आहे. भंडारा जिल्ह्यात (Bhandara Crime) लाखांदूर पोलिस स्टेशन अंतर्गत येणाऱ्या चप्राड येथे हा धक्कादायक प्रकार घडला आहे. या अत्याचारांमुळे बालिका गर्भवती झाल्यावर 18 वर्षीय युवकाने लग्न करण्यास नकार दिला आहे. पीडित अल्पवयीन बालिकेच्या तक्रारीवरुन लाखांदूर पोलिसांनी 18 वर्षीय युवकाविरोधात बलात्कार आणि पॉस्कोसह अॅट्रॉसिटी कायद्या अंतर्गत गुन्हा नोंद करण्यात आला आहे. 27 मार्च रोजी लाखांदूर पोलिसामध्ये गुन्हा दाखल करण्यात आला आहे. अंकुश दिवाकर हजारे (वय- 18) असं घटनेतील आरोपी (Accused) युवकाचे नाव आहे.

हे देखील पहा-

नेमकं काय आहे प्रकरण?

आरोपी युवकाने काही महिन्याअगोदर गावातीलच एका अल्पवयीन बालिकेशी प्रेमसंबंध निर्माण केले होते. तिला लग्नाचे आमिष दाखवत 5 महिन्यांपासून तो नियमित बलात्कार करत असल्याचा आरोप आहे. त्यानंतर अल्पवयीन बालिकेला गर्भधारणा झाली. त्यामुळे पीडित बालिकेने आरोपीला लग्नासाठी गळ घातली.

यावेळी आरोपीने गर्भवती अल्पवयीन बालिकेशी लग्न करण्यास नकार दिला. बालिकेने या घटनेची माहिती आपल्या कुटुंबियांना दिली. अल्पवयीन बालिका गर्भवती झाल्याचे माहित होताच कुटुंबियांनी बालिकेसह लाखांदूर पोलिसात धाव घेत आरोपी युवकाविरोधात तक्रार दाखल करण्यात आली.

या तक्रारीवरुन लाखांदूर पोलिसांनी आरोपी युवकाविरोधात बलात्कार आणि पॉस्कोसह अॅट्रॉसिटी कायद्यांतर्गत गुन्हा नोंद केला आहे. आरोपी युवकास अटक करण्यात आली आहे. पुढील तपास लाखांदुर पोलिस करत आहेत.

Edited By- Digambar Jadhav