Satara Crime News: गेल्या काही दिवसांपासून राज्यात गुन्हेगारीच्या घटनांमध्ये मोठी वाढ झाली आहे. यातील बहुतांश गुन्हे हे खंडणी, प्लॉटिंग, शेतजमिनीच्या वादातून घडत आहे. अशीच एक धक्कादायक घटना साताऱ्यातून समोर आली आहे. येथे एका जावयाने शेतजमिनीच्या वादातून आपल्याच चुलत सासऱ्यावर गोळीबार केला. (Latest Marathi News)

या घटनेत चुलत सासऱ्याचा जागीच मृत्यू झाल्याची माहिती आहे. सुनील शंकर भोईटे असे गोळीबारात ठार झालेल्या व्यक्तीचे नाव आहे. याप्रकरणी पोलिसांनी दोन संशयित आरोपींना ताब्यात घेतलंय. संदीप बळवंत यादव आणि रवी बळवंत यादव, अशी अटक करण्यात आलेल्या संशयित आरोपींची नावे आहेत. (Breaking Marathi News)

सातारा (Satara) जिल्ह्यातील कोरेगाव तालुक्यातल्या वाघोली गावात ही धक्कादायक घटना घडली. या घटनेनं परिसरात मोठी खळबळ उडाली आहे. मिळालेल्या माहितीनुसार, सुनील शंकर भोईटे आणि यादव यांच्यात शेतजमिनीचा वाद सुरू होता.

या वादातून संदीप बळवंत यादव आणि रवी बळवंत यादव या दोघांनी भोईटे यांच्यावर गोळीबार केला. या गोळीबारात भोईटे यांचा जागीच मृत्यू झाला. घटनेची माहिती मिळताच पोलिसांनी तातडीने घटनास्थळी धाव घेत भोईटे यांचा मृतदेह ताब्यात घेतला. तसेच तपासाची चक्रे फिरवत संशयित आरोपींना अटक केली. या घटनेमुळे परिसरात मोठी खळबळ उडाली आहे.

Edited by - Satish Daud