राज्यातील शिक्षकांवर लादण्यात आलेल्या SIR आणि BLO ड्युटीमुळे लाखो विद्यार्थ्यांचे शैक्षणिक नुकसान होतंय. या अतिरिक्त कामाच्या ताणामुळे आणि मनस्तापामुळे शिक्षकांनी थेट आंदोलनाचा पवित्रा घेतला. मात्र आता याच शिक्षकांसाठी सरपंच थेट रस्त्यावर उतरलाय. छत्रपती संभाजीनगर जिल्ह्यातल्या गेवराई पायगाचे सरपंच मंगेश साबळे यांनी जिल्हाधिकारी कार्यालयातच ठिय्या मांडला. जिल्हा परिषद शाळांमधल्या विद्यार्थ्यांचं शैक्षणिक नुकसान होत असल्यानं सरपंच साबळे थेट जिल्हाधिकाऱ्यांनाच नडले.

मात्र त्यांना पोलिसांनी अटकाव केला. त्यामुळे संतापलेल्या साबळेंनी पोलीस अधिकाऱ्यांनाही चांगलंच धारेवर धरलं....विशेष म्हणजे, शिक्षकांना निवडणुकीची कामे दिली तर विद्यार्थ्यांना शिकवणार कोण?, असा सवाल राज्यातील सर्वच जिल्ह्यांतून विचारला जातोय. त्यामुळे जिल्हाधिकारी कार्यालयावर जाऊन जाब विचारणाऱ्या सरपंच मंगेश साबळेंची भूमिका लक्षवेधी ठरलीये. हा प्रश्न केवळ शिक्षकांचा नसून तो विद्यार्थ्यांच्या प्राथमिक शिक्षणाच्या हक्काचा आहे. त्यामुळे सरकारनं यावर तोडगा काढण्याची गरज आहे.