धनंजय मुंडेंच्या मंत्रिपदाचा राजीनामा घेण्याची मागणी केल्यानंतर आता थेट त्यांच्यावर खुनाचा गुन्हा दाखल करण्याची मागणी करण्यात आली आहे. त्यांच्याविरोधात ही मागणी कोणी आणि का केली आहे. सरपंच हत्येशी संबंधित प्रकरणात धनंजय मुंडेंचा निकटवर्तीय वाल्मिक कराडवर मकोका लावण्यात आल्यानंतर धनंजय मुंडेंच्या राजीनाम्याची मागणी केली जात होती.

मात्र आता या प्रकरणात नवा ट्विस्ट आला आहे. धनंजय मुंडे पदाचा वापर करुन पुरावे नष्ट करण्याचा प्रयत्न करत असल्याचा आरोप करत मुंडेंवर हत्येचा गुन्हा दाखल करण्याची मागणी जरांगेंनी केली आहे. त्यामुळे एकच खळबळ उडाली आहे. तर सरपंच देशमुखांच्या हत्येनंतर पोलीसांनी कुणाच्या दबावामुळे आरोपींचे फोन ट्रेस केले नाहीत? असा सवाल धनंजय देशमुखांनी उपस्थित केला आहे.

सरपंच संतोष देशमुख हत्या प्रकरणाला 59 दिवस झाले आहेत. या प्रकरणी आतापर्यंत 8 आरोपींना अटक करण्यात आली आहे. तर कृष्णा आंधळे अजूनही पोलिसांच्या हाती लागला नाही. त्यातच धनंजय मुंडेंशी संबंधित वाल्मिक कराडवर खंडणी प्रकरणी मकोका लावण्यात आला आहे. त्यामुळे मुंडेंनी नैतिकच्या आधारावर राजीनामा देण्याची मागणी केली जात होती. मात्र आता धनंजय मुंडे आरोपींना वाचवत असल्याचा आरोप करण्यात आला आहे.

एवढंच नाही तर धनंजय मुंडे, त्यांचा ड्रायव्हर आणि मित्रांचे सीडीआर तपासण्याची मागणी मनोज जरांगेंनी केली आहे. त्यावरुन मुंडेंनी संताप व्यक्त केला आहे. आधीच दमानियांच्या घोटाळ्यामुळे हैराण झालेल्या मुंडेंवर आता हत्येचा गुन्हा दाखल करण्याची मागणी करण्यात आली आहे. त्यामुळे मुंडेंच्या अडचणीत वाढ झाली आहे. एसआयटीचे अधिकारी धनंजय मुंडेंचे सीडीआर काढून चौकशी करणार का हा खरा सवाल आहे.