Santosh Deshmukh Murder suspect Valmik Karad surrenders: मस्साजोगचे सरपंच संतोष देशमुख यांच्या हत्येच्या २१ दिवसानंतर मास्टरमाईंड वाल्मीक कराड पोलिसांना शरण आला. वाल्मीक कराड पोलिसांना शरण येणार ही बातमी समोर आली, त्यावेळी कार्यकर्त्यांनी सीआयडी कार्यलयाबाहेर मोठी गर्दी जमली होती. कार्यकर्त्यांना पांगवण्यासाठी पोलिसांना पाचारण करण्यात आले. बंदोबस्त उठला आणि अचानक पांढऱ्या स्कॉर्पिओमध्ये बसून वाल्मीक कराड सीआयडी ऑफिसमध्ये दाखल झाला.

पोलिसांकडे वाल्मीक कराड हा शरण येणार असल्याबाबतच्या अधिकृत अशी कोणतीही माहिती नसल्याने हळूहळू बंदोबस्त कमी करण्यात आला. त्यानंतर वरिष्ठ पोलीस अधिकारी देखील या परिसरातून निघून गेले, त्यानंतर वाल्मीक कराड हे आज शरण येण्याची शक्यता कमी असल्याचं वाटत असतानाच एका पांढऱ्या स्कॉर्पिओमध्ये सीआयडी ऑफिसमध्ये दाखल झाला.

वाल्मीक कराड याच्यासोबत परळी येथील दोन नगरसेवक देखील होते. मीडियापासून वाचण्यासाठी वाल्मीक कराड हा मधल्या सीटमध्ये लपून बसले होते, गाडी अत्यंत वेगाने सीआयडी ऑफिसच्या गेट वरती पोहोचली वाल्मिक कराड गेट वरतल आलेला दिसताच गेट वरती असलेल्या दोन पोलिसांनी अचानक त्यांना ताब्यात घेतलं. कार्यालयात नेलं यादरम्यान माध्यमांनी वाल्मीक कराड यांना गेले आठ दिवस तुम्ही कुठे होता? याबाबत प्रश्न विचारण्याचा प्रयत्न केला. मात्र त्यांनी हात जोडत प्रश्नांना उत्तर देण्यास नकार दिला.

वाल्मीक कराडची चौकशी सीआयडीचे अतिरिक्त महासंचालक प्रशांत बुरडे करत आहेत. संतोष देशमुख हत्याप्रकरणात गुन्हे अन्वेषण विभाग कार्यालयात वाल्मीक कराड याची चौकशी सुरु झाली आहे. वाल्मीक कराडने सरेंडर केल्यानंतर सीआयडी ऑफिसमध्ये पोलिसांचा मोठा बंदोबस्त तैणात करण्यात आलाय. कार्यलायाबाहेर कार्यकर्त्यांची मोठ्या प्रमाणात गर्दी जमली आहे.