सरपंच संतोष देशमुख हत्या प्रकरणी संशयीत आरोपी असलेल्या वाल्मिक कराडने सलग 11 दिवस पोलीसांना गुंगारा दिला.. एवढंच नाही तर वाल्मिक कराडचं लाईव्ह लोकेशन पुणे दाखवत असतानाही कराड पोलीसांना सापडला नाही. मात्र सीआयडीने वाल्मिक कराडच्या मालमत्तांवर टाच आणली आणि वाल्मिक कराडने शरणागती पत्करली.

मात्र वाल्मिक कराडने आत्मसमर्पण केलं असलं तरी कराडच्या आत्मसमर्पणावर संतोष देशमुखांच्या मुलीने सवाल उपस्थित केलाय. सरपंच संतोष देशमुख यांच्या निघृण हत्येप्रकरणी 7 जणांवर गुन्हा दाखल करण्यात आलाय. त्यातील 4 जणांना अटक करण्यात आलीय.. तर कराडवर हत्येप्रकरणी नाही तर खंडणीप्रकरणी गुन्हा दाखल करण्यात आलाय.

त्यामुळे सत्ताधारी आणि विरोधकांकडून वाल्मिक कराडवर मकोका लावण्याची मागणी करण्यात आलीय. वाल्मिक कराडच्या शरणागतीवर सत्ताधारी आणि विरोधी पक्षाच्या आमदारांकडून संशय व्यक्त केला जातोय.. मात्र मुख्यमंत्री देवेंद्र फडणवीसांनी बीड प्रकरणातील आरोपींना फाशीची शिक्षा देण्याबाबत सर्व प्रयत्न करणार असल्याचा इशारा दिलाय..

तब्बल 11 दिवस वाल्मिक कराड प्रचंड कार्यक्षम अशी ओळख असलेल्या महाराष्ट्र पोलिसांना गुंगारा देत होता. मात्र पोलीसांनी वाल्मिक कराडच्या संपत्तीवर टाच आणण्याची घेतलेली भूमिका आणि कराडच्या पत्नीची केलेली चौकशी या दबावामुळे कराड शरण आला की अटक न होता यंत्रणेवर दबदबा कायम ठेवत स्वतःच्या गाडीतून जात शरणागती पत्करली? याचीच चर्चा रंगलीय.