तबरेज शेख, प्रतिनिधी

Sant Nivruttinath Maharaj Yatra 2024 :

संतश्रेष्ठ निवृत्तीनाथ अनेकांचे श्रद्धास्थान म्हणून ओळखले जाते. आज षट्तिला एकादशीच्या शुभ मुहूर्तावर संतश्रेष्ठ निवृत्तीनाथ महाराजांच्या पौषवारी यात्रेला सुरुवात झाली आहे.

लाखो वारकऱ्यांच्या गर्दीने त्र्यंबकनगरी दुमदमून गेली आहे. कपाळावर टिळा, गळ्यात तुळशीची माळ आणि डोक्यावर तुळशी वृंदावन घेत महाराष्ट्रभरातून वारकरी त्र्यंबकेश्वरमध्ये (trimbakeshwar) दाखल झाले असून टाळ मृदूंगाचा गजर आणि हरिनामाच्या जयघोषाने इथले वातावरण भक्तीमय झाले आहे.

तीनशेहून अधिक दिंड्या दाखल झाल्या असून भाविकांनी दर्शनासाठी निवृत्तीनाथ महाराजांच्या समाधी मंदिरासमोर रांगा लावल्या आहेत. दरम्यान या सोहळ्याचे नियोजन करतांना प्रशासनाने 2027 मध्ये होणाऱ्या सिंहस्थ कुंभमेळ्याची रंगीत तालीम म्हणून याकडे पाहावे, वारकऱ्यांची गैरसोय होऊ नये यादृष्टीने उपाययोजना कराव्यात अशा सूचना मुख्यमंत्री एकनाथ शिंदे यांनी प्रशासनाला दिल्याने प्रशासन तसेच मंदिर (Temple) संस्थांकडून सर्व खबरदारी घेतली जाते आहे.

पालकमंत्री दादा भूसे यांनी आज सकाळी विधिवत पूजा केली असून सर्वांना सुखी ठेव अशीच प्रार्थना त्यांनी नाथांकडे केली आहे. या यात्रेनिमित्त त्र्यंबक नगरपरिषदेकडून यात्रेसाठी येणाऱ्या भाविकांना दिवाबत्ती, स्वच्छता, टॉयलेट सुविधांसह आरोग्याच्या सेवा पुरविण्याची व्यवस्था करण्यात आली आहे.

याशिवाय भाविकांसाठी विविध ठिकाणी पाण्याच्या टँकरद्वारे पिण्याच्या पाण्याची व्यवस्था उपलब्ध करुन देण्यात आली आहे. त्र्यंबकेश्वर येथील यात्रेसाठी राज्याच्या कानाकोपऱ्यातून भाविक येत असल्याने वारकऱ्यांची मोठी गर्दी होते. या गर्दीचा फायदा घेत काही चोरटे संधी साधण्याची शक्यता असते. त्यामुळे सीसीटीव्हींची देखील नजर राहाणार आहे.