सांगली : सांगली पोलिसांनी व्हेल माशाच्या उलटी तस्करी प्रकरणी मुख्य सूत्रधाराला सिंधुदुर्गच्या मालवणमधून (Malvan) अटक केली आहे. यावेळी तब्बल १८ कोटी ६० लाख किंमतीची १८ किलो व्हेल माश्याच्या उलटीचा पदार्थ जप्त केली आहे. (Maharashtra News)

सांगलीच्या स्थानिक गुन्हे अन्वेषण शाखेकडून काही दिवसांपूर्वी सांगली (Sangli) शहरामध्ये व्हेल माशाचे उलटी पदार्थ विक्री करण्यासाठी आलेल्या दोघांना अटक करण्यात आली होती. त्यांच्याकडून ५ किलो ७०० ग्रॅम वजनाचे व्हेल माश्याच्या उलटीचा पदार्थ जप्त करण्यात आले होते. त्याची किंमत बाजारामध्ये पावणे सहा कोटी रुपये असल्याचे समोर आले होतं.

उलटीचे पदार्थ सापडल्याचा बनाव

अटक करण्यात आलेल्या दोघांकडून तपासामध्ये या तस्करी प्रकरणी मुख्य सूत्रधाराचे नाव समोर आल्यानंतर पथकाने सिंधुदुर्ग जिल्ह्यातल्या मालवण येथून निलेश रेवंडकर यास अटक करत त्याच्याकडून १८ किलो वजन असलेले व्हेल माश्याच्या उलटीचे पदार्थ हस्तगत करत जप्त करण्यात आले आहेत. सांगलीमध्ये आपल्या साथीदारांना अटक झाल्याची माहिती मिळाल्यानंतर निलेश याने मालवणच्या समुद्र किनाऱ्यावर व्हेल माश्याच्या उलटीचे पदार्थ सापडल्याचा बनाव करत ते पोलीस मालवण पोलिसांकडे जमा केले होते. सदरची माहिती मिळाल्या नंतरच सांगली स्थानिक गुन्हे अन्वेषण शाखेने गतीने तपास करत बनवा करणाऱ्या नीलेश याला अटक केली आहे.